Ishte viti 1994. Paolo Adinolfi doli si zakonisht nga shtëpia e tij, në një prej lagjeve të Romës, Itali, dhe i tha familjes se do të kthehej për drekë… por kjo nuk ndodhi kurrë.
Në kohën kur u zhduk, ishte gjyqtar në Gjykatën e Apelit, por vetëm prej pak ditësh. Sepse Paolo Adinolfi, deri para pak kohësh, kishte shërbyer në seksionin e Falimentimeve të Gjykatës së Romës.
Por tani, 31 vjet pas zhdukjes së tij misterioze, mund të ketë ardhur një pikë kthese: që prej mëngjesit të së enjtes, hetuesit, me ndihmën e qenve, po gërmojnë nën Casa del Jazz, një pikë referimi për kulturën romake në fillim të rrugës Cristoforo Colombo, e ngritur mbi një pronë të sekuestruar nga krimi i organizuar.
Qëllimi është të kontrollohen dhe të gërmohen disa galeri të paeksploruara, që mendohet të jenë të periudhës romake, të cilat ndodhen pikërisht nën kompleksin që iu konfiskua krimit të organizuar.
Disa nga tunelët janë të njohur, të tjerë jo, dhe pikërisht për këtë arsye është vendosur të kryhen kontrolle edhe në këtë zonë nëntokësore. Të pranishëm janë edhe teknikë të Drejtorisë së Monumenteve, së bashku me karabinierë, pjesëtarë të Gardës së Financës dhe policisë. Brenda kompleksit, punëtorë me lopata po punojnë në vendet e treguara nga hetuesit për të hapur një kalim në tokë, ku duhet të kryhen gërmimet.
Vendimi për të ndërhyrë u mor pas një kërkese nga ish-gjyqtari Guglielmo Muntoni. Aktualisht nuk është e qartë mbi çfarë informacioni apo zhvillimi hetimor është bazuar operacioni që po angazhon disa ekipe.
“Mësova për këtë nismë në internet, mëngjesin e sotëm. Në këtë moment duhet vetëm të presim zhvillimin e kësaj veprimtarie. Unë dhe familja ime në këtë fazë nuk mund të themi më shumë”, deklaroi avokati Lorenzo Adinolfi, një nga djemtë e gjyqtarit të zhdukur, i cili shkoi menjëherë në Casa del Jazz.
“Kjo veprimtari nuk ka të bëjë vetëm me gjyqtarin Adinolfi. Qëllimi është të kuptohet çfarë mund të fshihet në galerinë e lashtë dhe historike që ndodhet nën Casa del Jazz, të cilën e gjetëm të mbuluar tridhjetë vjet më parë. Ideja është se ajo është mbuluar për të fshehur diçka”, tha vetë ish-gjyqtari që bëri kërkesën.
Paolo Adinolfi u zhduk më 2 korrik të vitit 1994. Atë ditë, teksa po dilte nga shtëpia në rrugën della Farnesina, Adinolfi i tha familjes se do të kthehej për drekë. Bashkëshortja e tij, Nicoletta, me fëmijët Giovanna dhe Lorenzo, e pritën, por ai nuk u kthye më kurrë.
Gjatë viteve ka pasur shumë hipoteza mbi arsyet e zhdukjes së magjistratit, i cili në detyrën e mëparshme para emërimit të fundit kishte pasur të bënte me çështje të rëndësishme që kalonin nga seksioni i Falimentimeve, një zyrë që, atëherë si sot, merret me çështje që mund të kenë lidhje edhe me ngjarje kriminale.
Hetimi mbi zhdukjen e tij është arkivuar, por misteret kanë mbetur. Sidomos për atë që Adinolfi bëri mëngjesin e zhdukjes dhe për një sërë dëshmish të mbledhura, sipas të cilave, njëra në veçanti, thotë se gjyqtari është parë në një autobus, ndonëse kishte dalë nga shtëpia me makinë, e cila më pas u gjet në Villaggio Olimpico. Ka edhe një tjetër dëshmi për praninë e tij në zyrat gjyqësore të piazzale Clodio, në shoqërinë e një të riu të panjohur.
Hipotezat kanë qenë të shumta, përfshirë atë të një lidhjeje mes zhdukjes së gjyqtarit dhe faktit që në vitet e mëparshme ishte marrë me çështjen e falimentimit të kompanisë Fiscom dhe më pas edhe me atë të Ambra Assicurazioni. Në rastin e parë, Enrico Nicoletti u dënua në shkallën e parë, i konsideruar nga hetuesit si arkëtari i Bandës së Maglianës, dhe për një kohë të gjatë është supozuar se gjyqtari mund të ishte varrosur në një pronë të tij. Pikërisht si në rastin e Casa del Jazz, ku këtë mëngjes po kryhen gërmime.
“Është e nevojshme të bëhet një verifikim, jo sepse po kërkohet diçka specifike, por sepse është marrë informacion se në pronën e konfiskuar nga Banda e Maglianës ndodhet kjo pjesë, një galeri e mbuluar, e panjohur, dhe është e drejtë të verifikohet çfarë ndodhet brenda”, tha prefekti i Romës, Lamberto Giannini.
Banda della Magliana ishte një organizatë kriminale famëkeqe që veproi në Romë nga vitet 1970 deri në fillim të viteve 1990. Ajo u themelua në vitin 1975 nga Franco Giuseppucci, Enrico De Pedis dhe Maurizio Abbatino, me bazë në lagjen Magliana të Romës. Ishte grupi më i fuqishëm mafioz në historinë moderne të kryeqytetit italian, duke kontrolluar aktivitete si trafik droge, zhvatje, vrasje me pagesë, rrëmbime dhe pastrim parash. Banda kishte lidhje të dyshuara me mafian siciliane, Camorrën napolitane dhe grupe të ekstremit të djathtë si NAR. U shpërbë gradualisht pas operacionit “Colosseo” të policisë italiane në vitin 1993, por ndikimi i saj në politikë, kishë dhe shërbime sekrete mbetet subjekt hetimesh dhe teorish konspirative.
