Deputeti i Partisë Demokratike, Ervin Salianji, ka sqaruar sherrin në mbledhjen e sotme të Komisionit Parlamentar të Sigurisë me deputetët socialistë. Në një deklaratë për mediat, ai tha se mazhoranca po tenton t’i mbyllë gojën opozitës.
“Deputetë me precedent duan të na mbyllin gojën. Një deputet më kërcënoi në komision për të mos thënë të vërtetën. Nuk kam pasur frikë nga punëdhënësit e tyre kur hyja në parcelat me kanabis e jo nga këta që janë qesharakë. Është fakt që Rama fle dhe zgjohet me krimin”, u shpreh Salianji duke shtuar se “banditët nuk ma mbyllin dot gojën”
Deputeti demokrat tha se debati me deputetët e mazhorancës nisi pas një pyetje që ai i drejtoi ministres Olta Xhaçka për buxhetin e Ministrisë së Mbrojtjes.
“E pyeta: A ju duhet më shumë buxhet për të kontrolluar ish-repartet ushtarake që përdoren për magazinim droge?”, tha Salianji.
Pas kësaj, kanë reaguar dy deputetët e PS-së, Sterkaj dhe Ndreu e kanë quajtur provokator deputeti Salianji, duke i thënë “ti do rrahur”.
Si ndodhi sherri ne komision
Plas sherri në Komisionin e Sigurisë, Ndreu për Salianjin: Po provokon të gjithë, ti do rrahur
Mbledhja e sotme e Komisionit Parlamentar të Sigurisë është shoqëruar me debate të forta mes deputetëve të opozitës dhe atyre të mazhorancës për buxhetin e Ministrisë së Mbrojtjes për vitin 2018. Deputeti demokrat Ervin Salianji e ka pyetur ministren e Mbrojtjes Olta Xhaçka për situatën me dorgën në vend, por kjo gjë ka ngjallur përplasje.
Dy deputetët e PS-së, Sterkaj dhe Ndreu e kanë quajtur provokator deputeti Salianji, duke i thënë “ti do rrahur”.
Pas këtij debati, deputetët e Partisë Demokratike janë larguar nga mbledhja e Komisionit.
DEBATI
Salianji pyet Xhaçkën: A ju duhet më shumë buxhet për të kontrolluar ish-repartet ushtarake që përdoren për magazinim droge? A ju duhet më shumë buxhet për të vendosur në funksion radarët…
Sterkaj: Je bilbil mali. Se vetëm për të folur ke ardhur.
Pjerin Ndreu (pa mikrofon): Mos i provoko të gjithë se do hash dajak. Ti do rrahur.
Sterkaj-Salianjit: Unë bëj mundje, boks, edhe karate. Mos më bëj mua presion.
Pjerin Ndreu: Rri more urtë se je bërë provokator i keq, rri more urtë, nuk e shikon çfarë është bërë në të kaluarën.
Salianji: Nuk pyes dhe s’kam frikë nga asnjë bandit me ose pa pushtet.
a.ç
