Kryeministri Edi Rama ka vizituar sot familjen prej tetë anëtarësh të Esat Lleshit në Kamëz. Ata janë strehuar në një banesë të re pasi shtëpia e tyre u shkatërrua nga tërmeti i 26 nëntorit.
Rama ka mbërritur me duart plot me dhurata për fëmijët e vegjël të familjes, teksa nuk kanë munguar as batutat.
“Do bëhesh bojaxhi si puna ime”, i tha Rama djalit të vogël pasi i kishte bërë dhuratë disa bojëra për të vizatuar.
“Kamëz, Tiranë – Në familjen prej tetë antarësh të Esat Lleshi, e cila u godit nga tërmeti e humbi strehën dhe sot, njësoj si mijëra familje të tjera të prekura është sistemuar në një shtëpi me qera.
Deri në ndërtimin e shtëpisë së re apo meremetimin e shtëpisë së dëmtuar, familja e Esatit dhe të gjitha familjet që kanë humbur shtëpinë në qytetet e prekura, plot 4127 të regjistruara aktualisht, do qëndrojnë me qera të paguara nga shteti”, shkruan Rama në Facebook. /e.s/
