Shqiptarët kanë një lidhje të fortë me estetikën dhe kujdesin për pamjen e jashtme, dhe kjo është gjithnjë e më shumë e dukshme në shoqërinë moderne. Përkushtimi ndaj bukurisë është bërë një fenomen që përfshin të gjitha grupmoshat dhe ka kaluar përtej stereotipeve të së kaluarës.
E ftuar në “7pa5” në Vizion Plus, me moderatorët Alma Çelaj dhe Syrjan Rahova, Evis Sinojmeri, konsulent e bukurisë, shqiptarët, në krahasim me shumë shtete të tjera europiane, janë veçanërisht të angazhuar për të përmirësuar pamjen.
Por Evis vuri theksin te kujdesi i shtuar i meshkujve shqiptarë për paraqitjen e tyre.
“Kanë nisur të trajtohen shumë edhe djemtë. Ne nuk themi më “qeth” flokët, por “pret” flokët, pasi ata tani i stilojnë, i lyejnë, stilojnë mjekrën dhe vetullat. Meshkujt sot trajtojnë fytyrën dhe kjo është një vlerë e shtuar. Ke shumë kënaqësi kur sheh një mashkull të kuruar”, tha ajo.
Një tjetër detaj që Evis Sinojmeri ka ndarë është se gjithnjë e më shumë politikanë shqiptarë janë duke i kushtuar rëndësi dukjes, duke u trajtuar përmes shërbimeve të bukurisë, duke përfshirë edhe mbjelljen e flokëve dhe përkujdesjen për vetullat.
“Kam patur politikanë që kanë ardhur në sallon dhe që i kushtojnë shumë rëndësi dukjes. Ka dhe politikanë që kanë bërë mbjellje të flokëve. Një pjesë goxha e konsiderueshme ka nisur edhe me vetullat edhe politikanët. Por mund të shohim edhe meshkuj që i heqin shumë vetullat edhe më shumë se femrat. Shikoj dhe trajtimet me botox, buzë të bëra, mollzat, ballin me baby botox. Shumë meshkuj kanë nisur ta përdorin. Nuk jam kundra, por në limite. Pasi humbin maskilitetin.“, tha Evis Sinojmeri.
Megjithatë, Evis Sinojmeri ka theksuar se, ndonëse këto trajtime janë të mirëpritura, duhet të jenë të kufizuara për të ruajtur maskilitetin dhe natyrshmërinë e pamjes së mashkullit. Ajo ka paralajmëruar se përdorimi i tepërt i këtyre trajtimeve mund të ndikojë negativisht në karakterin natyror të pamjes së meshkujve.
