Ish-kryeministri Sali Berisha denoncoi sot përmes një mesazhi të mbërritur në Facebook-un e tij se kryebashkiaku i Policanit Adriatik Zotkaj kishte rrahur një mësues.
Sipas denoncimit që qytetari kish bërë tek Berisha, Zotkaj i është drejtuar mësuesit me fjalët:“Pse më shikon, apo ngaqë s’je me PS-në?”, dhe më tej e ka qëlluar.
Për ngjarjen ka reaguar djali i kryebashkiakut, i cili pohon ngjarjen e ndodhur. Veçse ai thotë se motivi nuk është politik, por se “sebep” për sherrin është bërë një përplasje personale mes tij dhe djalit të mësuesit.
Në një reagim për JOQ, djali thotë se babai i tij kryebashkiak ndërhyri pasi i biri u përfshi në sherr me djalin e mësuesit. Ai thotë se çdo prind do të mbronte fëmijën e tij, qoftë ai edhe kryebashkiak a çfarëdo zyrtari.
Në reagimin e tij, djali kërkon falje që shkaktoi këtë incident, pasi nuk e kishte menduar se kjo do shfrytëzohej politikisht.
“Arsyeja e “sherrit” ishte personale midis meje dhe djalit të mësuesit, s’ka as politikë në mes asgjë, jua siguroj. Leje ça thotë Sala. Babai im duke më parë mua që po zihesha u afrua, u fut në mes të sherrit duke na ndarë pasi gjërat mund të përkeqësoheshin. Tani ju lutem më thoni kush është ai prind qoftë kryetar bashkie apo deputet, ministër që shikon djalin të zihet dhe nuk ndërhyn?? Kërkoj faljen për zënien pasi ishte e gjitha një keqkuptim dhe ju lutem publikojeni pasi dua që të qartësohet opinioni dhe nuk e durojmë dot atë nofkën “kriminel, bandit”. Ne nuk jemi të tillë, ju betohem për këtë. Kam bërë gabim pasi isha në xhiro me babin dhe nuk i mendova pasojat që mund ta lidhin me politikën. Gabimi im. Nuk po ju kërkoj as të fshini lajmin, asgjë, po të paktën të dali dhe versioni jonë i ngjarjes se cdo gjë që bëjmë ne publikohet dhe merr ngjyra politike, nuk është gjithmonë kështu. Unë i kuptoj të gjitha ato që nxirrni juve sepse atë punë keni, po të paktën e kemi të drejtën e një sqarimi se ndihem fajtor për përfshirjen e babit tim në muhabete fëmijësh”, tregon djali i kryebashkiakut për Jeta Osh Qef.
