Babai i Andi Malokut, i cili mbeti i vrarë në atentatin ndaj prokurorit Arjan Ndoja, Genci Maloku i ka dërguar një letër ministrit Sandër Lleshaj, drejtorit të Përgjithshëm i Policisë së Shtetit Ardi Veliu dhe ambasadorit Luigi Soreca.
Në letrën që Genci Maloku i ka dërguar institucioneve vë në dukje problematikën e hetimit me çështjen e vrasjes se djalit të tij dhe plagosjen e prokurorit Arjan Ndoja dhe Landi Muharreimit. Sipas babait të Andi Malokut, Policia e Durrësit nuk ka marrë të gjitha masat për parandalimin e ikjes së autorëve të krimit.
“Me anë të kësaj letre ju kërkojmë që të ndërhyni në gjendjen e paligjshme që po vazhdon në hetimin e çështjes penale në lidhje me atentatin kundër prokurorit Arian Ndoja, ku mbeti i plagosur ai vetë dhe shtetasi Aleksandër Laho dhe gjeti vdekjen djali im Andi Maloku,
Që nga momenti i ndodhjes së ngjarjes janë vënë re një sërë paligjshmërish dhe mungesë angazhimi total i forcave të ndryshme të agjencive ligjzbatuese në lidhje me këtë ngjarje të rëndë të ndodhur.
1-Nuk janë ngritur postblloqe që në momentet e para dhe nuk është treguar kujdes në lidhje me këtë fakt, në kushtet e flagrancës.
Ka qenë pakujdesia e autorëve të kësaj ngjarje që ka lënë aq shumë prova dhe kjo ngjarje të shkojë drejt zbardhjes, pasi nga forcat policore ka qenë një neglizhencë e madhe, sidomos nga drejtoria vendore e Policisë Durrës.
2-Edhe deri më sot nuk ka asnjë informacion apo variant operativ në lidhje me autorët e ngjarjes dhe bashkëpunëtorët e saj, që të jetë nxjerrë nga kjo drejtori me qëllim që të ndihmohet hetimi”, thuhet ndër të tjera në letrën e Genci Malokut.
Sa i takon arrestimit të Arjol Halilajt dhe ngritjes së akuzës për përkrahje të autorëve të krimit, babai i të ndjerit thotë se kjo është qesharake. Ndërsa ngre si shqetësim faktin që ende nuk i është marrë ADN-ja, Orgest Bilbilit, për të cilin policia ka ngritur dyshime, se së bashku me Lart Haxhiun, ishin qitësit kryesorë në atentat.
“Nuk mund te mbahet peng hetimi me argumentin se s’ka lente laboratorike për nxjerrjen e analizës se ADN-së”, shprehet Genci Maloku.
Maloku i kërkon kryeministrit që të marrë masat për të ndërprerë sipas tij këtë gjendje të paligjshme.
/e.rr
