Dixhitalizimi i mediave, ja kategoritë që do të përfitojnë dekoderat falas
Shqiptarët për të parë mediat do të pajisen me dekoder MP4, pasi të përfundojë procesi i dixhitalizimit. Sipas planit, çdo familje shqiptare duhet të blejë një dekoder.
Këshilli i Ministrave ka miratuar vendimin për përfitimin e dekoderave falas për familjet që përfitojnë nga skema e ndihmës ekonomike. “Ngarkimin e Ministrisë së Mirëqenies Sociale dhe Rinisë për kryerjen e procedurave të prokurimit për pajisjen me dekodera të familjeve në nevojë, përfituese nga skema e ndihmës ekonomike. Fondi prej 170 000 000 lekësh, që do të përdoret për kryerjen e procedurave të prokurimit për vitin 2015, të shtohet në buxhetin e Ministrisë së Mirëqenies Sociale dhe Rinisë, miratuar për vitin 2015. Ky fond të përballohet nga fondi rezervë i Këshillit të Ministrave. Pjesa tjetër e fondeve, prej 180 000 000 lekësh të përballohet nga buxheti i shtetit për vitin 2016. Ngarkohet Ministria e Mirëqenies Sociale dhe Rinisë për planifikimin e fondit të nevojshëm në buxhetin e saj për vitin 2016. Ngarkohet Shërbimi Social Shtetëror, në bashkëpunim me njësitë e qeverisjes vendore, të realizojë shpërndarjen e dekoderave te familjet përfituese të skemës së ndihmës ekonomike, sipas udhëzimit të ministrit të Mirëqenies Sociale dhe Rinisë. Ngarkohen Ministria e Financave, Ministria e Mirëqenies Sociale dhe Rinisë, Shërbimi Social Shtetëror dhe njësitë e qeverisjes vendore për ndjekjen dhe zbatimin e këtij vendimi”, – thuhet në vendimin e qeverisë.
