Lamtumira mes Juventusit dhe Alegrit shënon fundin e një epoke. Pesë vjet kampionate të fituara dhe ëndrra Champions që u ndërpre në 2 finale. Disa orë pas zyrtarizimit të largimit të tij, gjërat janë më të qarta. Anjeli ka dëshiruar të vazhdojë me teknikun livornez, por dyshja Nedved-Paratiçi kanë qenë kategorisht kundër.
Alegri kishte në mendje një mini-revolucion në skuadër. Sipas asaj që raporton “Corriere della Sera” ka qenë Nedved ai që ka këmngulur më fort për largimin e italianit. “Nëse qëndron Alegri, unë largohem” ka kërcënuar çeku. Me pak fjalë, dyshja drejtuese drejton gishtin nga Alegri për dështimin në Europë.
Por mediat italiane kanë analizuar edhe mungesën e rinovimit të kontratës dhe arsyet e divorcit. Pas pesë viteve dominim në Itali, Masimiliano Alegri ka pretenduar një rol “all Sër Aleks Ferguson” te Juventusi, por që Anjeli dhe sidomos Nedved nuk kanë qenë të gatshëm t’ia ofronin.
Rritja e pagës bashkuar me rinovimin është dukur e ekzagjeruar. Alegri ka pretenduar një rritje të ndjeshme nga 7.5 milionë eurot aktuale, në të paktën 10 milionë euro, plus bonuse, ndonëse është përfolur se kërkesa e tij ka arritur edhe në 12 milionë, si kolegët e mëdhenj në Europë, të tipit Guardiola, Klop etj.
Merkatoja ka qenë një tjetër temë e nxehtë. Trajneri i Juventusit kërkoi një ulje të moshës mesatare, por ka dashur edhe pushtet të plotë në kryerjen e saj, plus afrimin me çdo kusht të një fantazisti të tipit Modriç e Isko.
Kritikat e marra pas humbjes në ndeshjen e vajtjes kundër Atletikos dhe mosdalja në mbrojtje nga ana e drejtuesve të klubit, ka bërë që Alegri të ndihet i tradhtuar nga drejtuesit e tij.
Fiksimi i fitimit të Champions-it nga ana e drejtuesve ka qenë gjithashtu një pikë e nxehtë përplasjeje, pasi vetë Alegri nënvizoi se edhe blerja e një jashtëtokësori si Ronaldo nuk mjaftonte.
g.kosovari
