Ashtu siç ka vepruar shpesh kohët e fundit paraardhësi i tij në krye të Partisë Demokratike, edhe Lulzim Basha po përpiqet të bëjë diversion brenda krerëve të mazhorancës. Pas mbledhjes së grupit parlamentar demokrat, kryetari Lulzim Basha tha se Rama është i pabesueshëm kur përpiqet t’u mbushë mendjen partnerëve se Ilir Meta dhe opozita nuk e duan Reformën.
“Nuk të beson askush kur u thotë ndërkombëtarëve se opozita nuk e do Reformën, Ilir Meta nuk e do reformën”, tha Lulzim Basha.
Më tej ai deklaroi se Edi Rama nuk e do Reformën në Drejtësi, pasi kërkon të ketë gjyqtarë të korruptuar për të mbuluar korrupsionin qeveritar.
“Të ulemi për ti dhënë venit Reformën në Drejtësi. Kemi sot një dokument ku mund të bazohemi, kemi qëndrimet e Venecias. Të gjithë e kanë kuptuar se loja me ekspertë ishte një përpjekje po kaq mjerane e Ramës për t’i ikur Reformës në Drejtësi. Loja me ekspertë mbaroi. Partnerët ndërkombëtarë e kanë kuptuar ku ka mbetur sharra në gozhdë, është Edi Rama që do të kapë drejtësinë. Askush nuk ka nevojë sot më shumë se Edi Rama për gjyqtarë të korruptuar që ka përfituar miliona euro nga konçesionet korruptive. Askush nuk është më i interesuar për Reformën në Drejtësi se Partia Demokratike, e cila nuk ka kauzë më të madhe se Reforma në Drejtësi. Krimi nuk luftohet me korrupsion dhe me drejtësi të kapur. Nëse do Reformën kryeministri duhet t’i përgjigjet ksaj ftesës sonë publike, që në fakt ftesën duhet ta bënte ai si kryeministër. Kam prej shtatorit që i bëj të njëjtën ftesë për Reformën në Drejtësi”, tha më tej Basha.
Kreu i opozitës i bëri thirrje mazhorancës të miratojnë në Parlament me procedurë të përshpejtuar ligjin për Byronë Kombëtare të Hetimit.
“Byroja Kombëtare e Hetimit duhet të futet në rendin e ditës ditën e enjte. S’ka mbetur gjë tjetër për t’u rakorduar. Gjithçka është rakorduar. Taksapaguesit amerikan përmes ndërhyrjes së çmuar të ambasadorit Lu kanë vënë në dispozicion miliona dollarë për trajnimin e prokurorëve dhe policëve që do jenë pjesë e kësaj strukture. Po për këtë çfarë presim, pse vonohemi. Autorizoj kryetarin e grupit që nesër në seancë t’i kërkojë kryetarit të Kuvendit të miratohet me procedurë të përshpejtuar ligjin për Byronë Kombëtare të Hetimit”, tha Basha.
