Në Vlorë është hapur këtë fillim fundjave panairi i policisë me emrin “Ditë e Hapur me Policinë”. Ministri i Brendshmë Sajmir Tahiri, tha se qëllimi kryesor është që të sjellim policinë e shtetit me fytyrën e njeriut pranë qytetarëve, për të treguar se “ka vetëm një mënyrë për të pasur sukses, të gjithë bashkë kundër paligjshmërisë, kriminalitetit, për t’i bërë qytetet tona më të sigurta. Dhe kjo është vetëm të bëhemi bashkë.”
Ministri theksoi se panairi i policisë në Vlorë është një dritare komunikimi me qytetarët.
“Shumë është thënë, veçanërisht gjatë muajve të verës. Shumë akuza dhe baltë është hedhur mbi Policinë e Shtetit. Në fakt kjo është Policia e Shtetit. Kjo që shihni këtu, kjo që shikojnë qytetarët e Vlorës.
Shërbim për qytetarët. Angazhim për qytetarët. Përkushtim për t’i shërbyer më mirë qytetarëve në luftën kundër kriminalitetit, paligjshmërisë dhe informalitetit.
99.99% e qytetarëve shqiptarë janë ata që respektojnë ligjin. Janë ata që e duan ligjin, janë ata që duan qytete të sigurta. Janë ata që duan shtetin ligjor. Janë ata që duan shtetin në fund të fundit. 99.99% e qytetarëve, edhe këtu në Vlorë, janë ata që duan të bëhen bashkë me institucionet në tërësi dhe Policinë e Shtetit në veçanti, për t’i bërë qytetet tona më të sigurta dhe për t’i dhënë mundësi shoqërisë të ketë mirëqenie dhe zhvillim ekonomik.”- deklaroi ministri Tahiri.
