Ministri i Brendshëm, Saimir Tahiri ka vizituar panairin “Ditë e hapur me Policinë” në Sarandë. Ai theksoi se kjo është fytyra e vërtetë e Policisë së Shtetit përtej baltës dhe akuzave të marra padrejtësisht.
“Ne i kaluam dy ditë të mrekullueshme në Sarandë, duke u treguar qytetarëve dhe turistëve të Sarandës, Policinë e Shtetit dhe fytyrën e vërtetë të Policisë së Shtetit përtej baltës dhe akuzave të përditshme që ka marrë policia e Shtetit, padrejtësisht.
Kjo është ajo që shohin qytetarët, shërbimin që jep Policia e Shtetit dhe mundësitë që ka policia për t’u bërë bashkë me qytetarët për të ndërtuar qytetet më të sigurta”, deklaroi Tahiri.
Ministri Tahiri theksoi rëndësinë e bashkëpunimit me qytetarët për të pasur qytete më të sigurta.
“Sot dhe dje, turistët dhe qytetarët e Sarandës kanë pasur mundësi të vizitojnë tendat e panairit në këtë “Ditë të hapur” të Policisë së Shtetit për qytetarët, duke i treguar teknologjinë, kapacitetet e policisë, nga njëra anë, dhe nga ana tjetër, mundësinë që të bëhemi bashkë në një platformë unike bashkëpunimi, sepse mënyra e vetme për të ndërtuar qytete më të sigurta është kur bashkëpunojnë të gjithë.
Ndaj unë dua të falënderoj çdo qytetar që ka marrë pjesë dhe na ka dhënë mundësinë të bëhemi miq. Qytetarët dhe punonjësit e policisë për të ndërtuar qytete të sigurta”, deklaroi Tahiri.
Ministri Tahiri theksoi se policia është reformuar në mënyrë rrënjësorë 3 vitet e fundit dhe se është e rëndësishme që të jemi bashkë.
“Në këto 3 vite kemi reformuar policinë në mënyrë rrënjësore, nga pikëpamja e shërbimit, nga pikëpamja e mundësive infrastrukturore, nga pikëpamja e buxhetit, duke u dhënë punonjësve të policisë mundësinë që të punojnë në kushte më të mira, që të jenë larg korrupsionit dhe duke u dhënë mundësinë qytetarëve të kuptojnë se bashkarisht mund të ndërtojmë më shumë siguri.
Por mbi të gjitha, shumë e rëndësishme të kuptojmë që Policia e Shtetit nuk është e vetme.
Duhet të jemi të gjithë bashkë, institucionet në tërësi, punonjësit e policisë dhe qytetarët, për të bërë atë që presim, atë që kemi premtuar, atë për të cilën jemi angazhuar dhe atë për të cilën kemi nevojë, shoqëria në tërësi, qytetarët dhe e ardhmja e fëmijëve tanë”, deklaroi ministri Tahiri.
