Qendra e Tiranës sot ka qenë katër herë më pak e ndotur se në një ditë normale, ku qarkullimi i automjeteve është diçka e zakonshme. Lajmi konfirmohet nga Bashkia Tiranë. Sot, shumë qytetarë të kryeqytetit i janë bashkuar dhjetra aktiviteteve të organizuara në segmentin nga Hotel Dajti te sheshi Skënderbej.
Kryetari i Bashkisë së Tiranës, Erion Veliaj, falenderoi të gjithë qytetarët që sot zgjodhën të mos i përdornin makinat e tyre dhe që ndihmuan në oksigjenimin e qendrës së qytetit.
“Sot matëm nivelin e ndotjes së ajrit në qendër të Tiranës, i cili ishte 4 herë më i pastër se në një ditë normale. Mjafton vetëm kjo statistikë për të kuptuar se, ashtu si çdo trup i sëmurë që ka nevojë të oksigjenohet, ashtu edhe një qytet i “sëmurë” ka nevojë të oksigjenohet”, u shpreh Veliaj.
Ai bëri të ditur se në Tiranë ka 800 mijë segmente rrugore që përshkohen nga makinat çdo ditë, nga të cilat 400 mijë janë më pak se 1 kilometër. Sipas tij, nëse secili prej nesh, segmentet me më pak se 1 kilometër distancë, do t’i bënte me biçikletë ose në këmbë, trafiku do të ulej me 50%.
