Bashkia e Tiranës ka organizuar më shumë se 50 aktivitete të ndryshme festive me rastin e Ditës së Verës. Kështu ka deklaruar kreu i Bashkisë së Tiranës Erion Veliaj duke falenderuar të gjithë punonjësit që dita e sotme të ishte gati, pas protestës së dhunshme të opozitës e cila u mbajt një ditë më parë.
Gjatë fjalës së tij, kryebashkiaku nuk la pa përmendur edhe protestën e ditës së djeshme të opozitës.
“Unë dua ti falënderoj të gjithë qytetarët e Tiranës që dje u distancuan nga aktet e dhunës, të zjarrit, të hurit dhe litarit dhe sot demonstrojnë atë që Tirana është vërtet. Tirana përtej të majtës dhe të djathtës, përtej PD dhe PS e do jetën e do shtetin, e do artin dhe kulturën. Ndaj dhe për këtë Tiranë edhe për fëmijët e këtij qyteti, që nuk ka fare rëndësi çfarë bindjesh kanë prindërit, po në këtë qytet punohet njësoj për të gjithë. Ndaj mesazhi që japim për Ditën e Verës është hajde të fokusohemi tek gjërat që na bashkojnë, hajde të fokusohemi tek një Tiranë që po bën progres, hajde të fokusohemi tek dashuria, paqja dhe jo për tu përçarë dhe dhunuar një qytet që mezi ne e ndërtojmë”, deklaroi Veliaj.
Mumri një i Tiranës theksoi se qyteti nuk e pranon bulizmin, nuk e pranon dhunën, pavarësisht se nga cili qytet vijnë.
“Për të gjitha ata që erdhën dje për ekskursion në Tiranë, unë u bëj një pyetje: Sa mirë pastrohet qyteti nga vini Burreli, Kamza, Paskuqani, Shkodra, Lezha, Pogradeci? Sa mirë janë kopshtet dhe shkollat në qytetin prej nga vini për të dhunuar Tiranën”, tha Veliaj.
Kryebashkiaku tha se Tirana nuk mund të tolerojë dhunën në Tiranë.
“Që dikush të lerë qytetin e vet në situatë mizerje dhe vjen të prishë qytetin tonë, kjo është diçka që Tirana nuk e toleron. Përgjigjja jonë nuk është përgjigje e dhunshme, përgjigjja jonë është një përgjigje me hare, me gëzim, me bashkim. Tirana vetëm pak orë pas shkatërrimit të djeshëm ka ngritur kokën, të gjithë janë këtu sepse kjo është Shqipëria e vërtetë”, tha ai më tej.
Veliaj tha se sot jemi tre fish më shumë sesa opozita dje në protestë, ndërsa duke treguar mesazhin e një miku demokrat, Veliaj rikonfirmoi kandidimin për një mandat të dytë në Tiranë.
