Sot pritet të mbahet protesta e 5-të për vrasjen e Klodjan Rashës në kryeqytet. Thirrja është bërë sërish në rrjetet sociale, ku thuhet se marshimi do të nis nga sheshi “Skënderbej” drejt bulevardit ‘’Dëshmorët e Kombit’’ dhe më pas te Drejtoria e Policisë së Shtetit.
Policia ka marrë masat, ku 1500 efektivë janë vënë në dispozicion për të ruajtur institucionet kryesore si Kryeministria, Ministria e Brendshme, Drejtoria e Policisë së Tiranës etj, që janë objekte përgjatë itinerarit të marshimit të protestuesve. FNSH ndodhet në gatishmëri pranë institucioneve, ndërsa autobote me ujë janë vendosur në krahë të tyre.
Tiranë është ndezur nga protestat e dhunshme prej 4 ditësh, ku janë regjistruar akte të shumta të dhunës dhe shkatërrimi të tabelave dhe semaforëve në rrugë, ku nuk kanë munguar as vënia e zjarrit të koshave të mbeturinave apo objekteve të tjera.
Protestat nisën për vrasjen e 25-vjeçarit Klodjan Rasha nga një polic, por disa të rinj të revoltuar nisën dhunë duke shkatërruar gjithçka nëpër rrugë dhe duke gjuajtur me gurë efektivë e policisë, ku gjatë këtyre ditëve protesta 25 prej tyre kanë mbetur të lënduar, njëri në gjendje më të rëndë pasi rrezikonte të humbiste syrin.
/a.r
