Avokati i Popullit, Igli Totozani, sot, në Ditën Kombëtare në Ndihmë të Jetimëve, shprehet me shqetësim për situatën ku ata ndodhen dhe trajtimin e tyre të papërshtatshëm dhe shpeshherë abuziv në qendrat rezidenciale.
Jetimët sot janë një nga grupet më në nevojë të shoqërisë shqiptare, ndaj të cilëve shteti ka detyrimin social të ndihmës e përkujdesit; mundësimin e strehimit të përshtatshëm e punësimit, si dhe të një përmirësimi të vazhdueshëm të kushteve të jetesës, shprehet ai.
Decentralizimi i kompetencave nga pushteti qendror tek ai vendor, ka evidentuar se qeverisja vendore nuk është përfshirë sa duhet në ushtrimin e përgjegjësive për administrimin efektiv dhe monitorimin e institucioneve të transferuara në varësi të saj. Mungesa e kapaciteteve dhe mundësitë e kufizuara financiare bëjnë që qeverisja vendore të mos i përgjigjet kërkesave për ngritjen e shërbimeve të reja në ndjekje të dinamikës së nevojave të fëmijëve.
Avokati i Popullit thekson se krijimi i sistemit të integruar të mbrojtjes së të drejtave të fëmijëve, ku çdo hallkë lidhet me tjetrën, për parandalimin e shkeljeve apo ndërhyrjen për mbrojtjen dhe rehabilitimin e të miturve, menaxhimin dhe ofrimin e shërbimeve mbështetëse nga pushteti vendor përbëjnë sot një nga sfidat më të rëndësishme.
Shoqëria dhe shteti shqiptar duhet të reflektojë për më shumë ndihmë dhe investim në mbrojtje të të drejtave njerëzore të kësaj shtrese të popullsisë. Avokati i Popullit insiston në kërkesën se duhen më tepër investime, dhe jo vetëm nga pikëpamja materiale e financiare, por edhe në kuptimin e ndjeshmërisë dhe të shumëfishimit të energjive kushtuar mbrojtjes më të mirë e promovimit të mirëqënies e zhvillimit të fëmijëve jetimë.
Dhënia prioritet fëmijëve në nevojë, të cilët varen nga dora e shtetit duhet të jetë e ngulitur në planveprimin e gjithsecilit, duke i mbrojtur ata nga neglizhenca, keqtrajtimi, abuzimi apo shfrytëzimi seksual, siç parashikohet në Konventën për të Drejtat e Fëmijës;
Një sfidë përbën edhe strehimi e punësimi i tyre. Problemet që po kalon sot shoqëria shqiptare kanë viktimizuar së pari këtë pjesë të pambrojtur të popullatës. Të mos harrojmë për asnjë çast që të drejtat e Njeriut karakterizohen nga universaliteti dhe patjetërsueshmeria, pandashmëria, ndërvartësia dhe barazia e mosdiskriminimi, theksoi Totozani.
E po ashtu duke vënë në dispozicion fonde të përshtatshme në nivel vendor për të siguruar që politikat qeveritare që rregullojnë decentralizimin e shërbimeve sociale dhe deinstitucionalizimin e kujdesit për fëmijët, të garantojnë efektivisht interesin më të mirë të fëmijës, në përputhje me përcaktimet e Konventës së OKB “Për të Drejtat e Fëmijës”.
Avokati i Popullit do të vijojë përpjekjet për një mbrojtje më të madhe sociale për të gjithë fëmijët nën kujdes rezidencial, përfshirë fëmijët e braktisur dhe fëmijët pa përkujdes prindëror.
ATSH/d.i.
