Një grup shpërndarësish droge përbërë nga italianë dhe shqiptarë janë dënuar në Itali me heqje lirie dhe gjobë. Vendimi është dhënë vetëm për disa nga anëtarët e grupit të cilët kanë pranuar të gjykohen me procedurë të shkurtuar, gjë e cila do t’u ulë 1/3 e dënimit.
Mariglen Metushi, 28 vjeç u dënua me 4 vjet burg dhe 16 mijë euro gjobë. Ai thirrej “Mario” dhe ishte lideri i grupit për këtë arsye dhe operacioni i policisë ishte “Super Mario Bros” sipas lojës së famshme. Metushi nuk i kishte bërë asnjëherë duart “pis” pasi vetëm jepte urdhra dhe drejtonte trafikun e drogës në Frentano dhe Chieti.
Vilson Avdyli, 35 vjeç u dënua me 4 vite e 6 muaj burg dhe me 18 mijë euro gjobë. Italianët Frederico De Rosa, 33 vjeç, mori 3 vjet e 1 muaj burg dhe 14 mijë euro gjobë dhe Antonio Raillo, 43 vjeç, 3 vjet burg dhe 6 600 euro gjobë.
Për shkak të denoncimit të Raillo-s në vitin 2014, nisi dhe hetimi i policisë italiane. Ai denoncoi kërcënimin që i vinin nga furnizuesit me kokainë për shkak se u kishte një borxh prej 5 mijë euro.
Pjesa tjetër e grupit, mes të cilëve janë shqiptarët Kastriot Metani, 43 vjeç, Hamit Dybeli, 38 vjeç, Arber Xhyheri, 23 vjeç dhe Klodjan Ballshi 24 vjeç do të dalin para gjykatës më 11 tetor.
Sipas hetuesve, grupi shiste çdo javë qindra gramë heroinë në Peskara me një çmim që varionte nga 70 deri në 100 euro për gramë.
