Disidenti i ish-Gjermanisë Lindore dhe njëherazi shefi i entit të ruajtjes së dosjeve të ish-sigurimit të RDGJ-së, Roland Jahn, ka deklaruar sot në një intervistë për Deutsche Welle se Shqipëria duhet të hapë dosjet e spiunëve të ish-Sigurimit të Shtetit.
Duke folur për rënien e murit të Berlinit, që përkon me 9.11.1989, Roland Jahn, shprehet se “Rrëzimi i murit ishte një ndjenjë shpërblimi. Ishin vetë njerëzit, lëvizja qytetare, që e rrëzuan me një revolucion paqësor”.
Ndërsa për krahasim te një disidenti në Gjermani dhe një disidenti në Shqipëri, Jahn pohon se “Kushtet e disidencës në Shqipëri ishin specifike, sepse Shqipëria ishte krejtësisht e izoluar nga pjesa tjetër e botës. Ne në ish-Gjermaninë Lindore, kishim përparësinë që kishim Gjermaninë Perëndimore që paguante për lirimin e të burgosurve, që informonte opinionin. Sidomos informacionet që fusnin mediat gjermano-perëndimore në Lindje, ishin shumë të rëndësishme për ne. Ato e çuan përpara revolucionin”.
I pyetur për raportet sot me ish-persekutorët, Roland Jahn përgjigjet: “Mendoj se më e rëndësishmja është zbardhja e periudhës së diktaturës dhe e emrave të personave përgjegjës. Askush nuk duhet të lirohet nga përgjegjësia”. “Ne duam t’i japim Shqipërisë nga përvoja jonë e përballjes me diktaturën komuniste. Kohët e fundit shqiptarët kanë nisur të përballen më mirë me të shkuarën. Por, një gjë është e rëndësishme: Hapja e Dosjeve. Hapja e dosjeve të sigurimit, që të mos na mbysë më helmi i tyre”, thekson Roland Jahn.
Roland Jahn, i lindur në Jena në vitin 1953, ka qenë një nga disidentët më të shquar të periudhës së diktaturës në ish-Gjermaninë Lindore. /b.d
