Rusia nisi një sulm masiv ndaj rajoneve të Kievit dhe Odesës. Autoritetet ukrainase njoftuan se nëntë persona humbën jetën dhe mbi një duzinë të tjerë u plagosën. Kjo shënon ditën e gjashtë radhazi të sulmeve ndaj kryeqytetit ukrainas.
Sulmet vazhdojnë si në Ukrainë ashtu edhe në Rusi, ndërsa po bëhen përpjekje për të gjetur një zgjidhje për t’i dhënë fund konfliktit më vdekjeprurës në kontinentin evropian që nga Lufta e Dytë Botërore, i cili nisi me pushtimin në shkallë të gjerë nga ana e Moskës në shkurt të vitit 2022.
Tetë persona u vranë dhe pesë të tjerë u plagosën në Kiev – mes tyre tre fëmijë –njoftuan shërbimet e emergjencës përmes aplikacionit të mesazheve Telegram.
Në Boryspil, në rajonin e Kievit, një person humbi jetën dhe nëntë të tjerë, përfshirë një fëmijë, u plagosën pasi raketat dhe dronët dëmtuan një ndërtesë banimi dhe një objekt biznesi, bëri të ditur guvernatori Tymur Tkachenko në Telegram.
Sulmet e përditshme ruse ndaj Kievit dhe rajonit përreth po ndikojnë rëndë në jetën e miliona njerëzve. Alarmet për sulme ajrore përfshinë pjesën më të madhe të territorit të Ukrainës në orët e para të së martës.
Rusia ka shtuar sulmet në zonat kufitare të Ukrainës, krahas atyre ndaj objekteve energjetike dhe logjistike; të martën, një sulm i ri ndërpreu kalimet kufitare drejt Rumanisë – vend anëtar i Bashkimit Evropian dhe NATO-s – në pikën e Orlivkës, buzë lumit Danub.
Në Rusi, një sulm me dron shkaktoi një zjarr në zonën portuale të Ust-Luga-s, një pikë kryesore eksporti në veriperëndim, ndërsa Moska po zmbrapste dronët.
Në rajonin e Samarës – ku ndodhen disa rafineri të mëdha nafte, rreth 800 km në juglindje të Moskës – një sulm ajror dëmtoi objekte civile, sipas njoftimit të guvernatorit lokal në Telegram.
