Pesë shtete europiane kanë vendosur të lehtësojnë disi masat e karantinës që po aplikojnë si pjesë e luftës kundër pandemisë së koronavirusit.
Gjermania të hënën rihapi dyqanet me sipërfaqe jo më të madhe se 800 metra katrorë, por edhe shitblerjen e automjeteve, të biçikletave dhe libraritë.
Rikthimi i ngadaltë drejt normalitetit vjen pas deklaratave se pandemia po vihet nën kontroll, rastet e reja po zbresin, ndërkohë që mbi 4,600 persona kanë mbetur viktima dhe 145 mijë të tjerë janë konfirmuar si bartës të infeksionit.
Franca gjithashtu njoftoi rikthimin e vizitave në klinikat për të moshuarit, teksa koronavirusi është përhapur në 45 për qind të tyre, edhe pse kontakti fizik do mbetet i ndaluar dhe vetëm dy vizitorë mund të jenë të pranishëm në të njëjtën kohë.
Masat si distancimi social, testimet dhe maskat pritet të jenë të detyrueshme edhe kur vendi të nisë zbutjen e karantinës në muajin maj.
“Po studiojmë kushtet si mund ta realizojmë heqjen e kufizimeve, por me gjasë kur bëhet fjalë për transportin publik, ku logjikisht ka dendësi më të madhe popullsie, qytetarët do e kenë të nevojshme të mbajnë një maskë normale,” njoftoi të dielën kryeministri francez, Eduard Filip.
Edhe Norvegjia, Çekia dhe Polonia kanë nisur të zbatojnë masa më të lehta karantine për qytetarët.
Në Çeki rikthimi i jetës publike do realizohet në pesë faza, me hapjen e tregjeve, lejimin e udhëtimeve për qëllime pune dhe vetëkarantimin e secilit për 14 ditë pas kthimit në vendlindje.
Norvegjia ka hapur çerdhet me gjithë rezervat e disa prindërve, ndërsa shkollat, universitetet dhe floktoret do rifillojnë aktivitetet javën që vjen, ndërsa ndërsa Danimarka tashmë ka rihapur disa prej shkollave të saj. Zvicra ka caktuar një datë (11 maj) për të bërë të njëjtën gjë
Në Poloni, ndërkohë, nga e hëna janë rihapur parqet dhe pyjet, sikundër edhe numri i personave që mund të hyjnë njëherësh në dyqane.
Sidoqoftë, jo e gjithë Europa po lëviz në të njëjtin drejtim, pasi Britania dhe Franca zgjasin pengesat e tyre në maj me Spanjën që ka të ngjarë të bëjnë të njëjtën gjë.
Italia ka ndërmarrë vetëm hapa shumë të kufizuar për të lehtësuar bllokimin – dhe rajone të caktuara madje i kanë rezistuar disa prej tyre – ndërsa Finlanda ende ka shumicën e kufizimeve të saj në vend.
Ndërsa kontinenti europian deri tani rezulton nga më të prekurit nga pandemia e koronavirusit, me më shumë se 1 milionë raste dhe gati 100 mijë viktima.
