Shqipëria synon që të ulë me 11.5 për qind nivelin e dioksidit të karbonit, deri në vitin 2030. Këtë e ka bërë të ditur kryetari i Kuvendit, Ilir Meta, në Konferencën Parlamentare të Nivelit të Lartë për Ndryshimet Klimaterike të Zonës Euromesdhetare. Konferenca po i zhvillon punimet në Paris, ku ndodhet aktualisht kryeparlamentari shqiptar. Meta deklaroi se “Shqipëria i mbështet qëllimet e përbashkëta që duam të arrijmë në dhjetor në Paris. Kontributi kombëtar i synuar i Shqipërisë është ulja e e dioksidit të karbonit me 11.5 për qind deri më 2030”.
Gjatë vizitës në Francë, Meta është pritur nga Presidenti i Senatit Francez, Gerard Larcher. Kryetari i Kuvendit shprehu kënaqësinë e nisjes së fluturimeve direkt mes Parisit dhe Tiranës dhe shprehu vullnetin për të mirëpritur më tepër investime franceze në fushat strategjike të zhvillimit të Shqipërisë.
