Ekspertja e ekonomisë Romina Radonshiqi ishte e ftuar këtë të shtunë në Euronews Albania, ku foli në lidhje me vendimin e Gjykatës Kushtetuese për shfuqizimin e Bordit të Transparencës për përcaktimin e çmimit të ushqimeve.
Ekspertja i bëri thirrje qytetarëve të jenë të qetë, pasi me shfuqizimin e bordit çmimet e ushqimeve nuk do të rriten, pasi është tregu ai që i kontrollon dhe vendos ato.
“Nuk mendoj se mos-ekzistenca e bordit do të rrisë çmimet. Qytetarët të jenë të qetë, pasi ekziston apo jo bordi është tregu ai që do të vendosë mbi çmimet”, tha ekspertja.
Ajo shtoi se edhe në momentin që ishte funksional, bordi nuk pati ndonjë efekt të madh në kontrollin e çmimeve, pasi ishte kërkesa dhe oferta që vendoste mbi çmimet.
“Unë si eksperte mendoj se bordi nuk kryente ndonjë funksion që në momentin që u ngrit, pasi është e pamundur të kontrollosh çmimet e tregut. Kërkesa dhe oferta i rregullon, shteti e ka të vështirë. Ky bord nuk është më funksional pasi dhe puna për të cilën u ngrit nuk u realizua 100%. Për më tepër u tha se do të monitoroheshin çdo javë çmimet, por vetëm 3 takime mbajti.
Ku ishin ata anëtarë?! U mundua dhe u ngrit me qëllimin e mirë për të përmirësuar gjendjen, por në një ekonomi të lirë efekti i bordit nuk do të jetë i madh. Një efekt psikologjik e ka dhënë që çmimet të mos rriteshin më tepër”, tha ajo./m.j
