Aksidenti i Michael Schumacher po bën afërsisht tre vite që ka ndodhur. Pas shumë kohësh në spital, gjermani po vazhdon fazën e riaftësimit në shtëpinë e tij në Gland të Zvicrës. Një person pretendon se disponon një foto të kampionit të garave të automobilizmit të shkrepur kohët e fundit dhe do ta nxjerrë atë në shitje për 1 mln euro, raporton RTL-Portal vip.de.
Prokuroria ka nisur hetimet pasi mendohet se foto, e cila thuhet të jetë në shitje, cënon privatësinë e Michael Schumacher. Fotoja mendohet se tregon Schumacher në krevat dhe mesa duket është shkrepur nga shumë pranë të sëmurit.
Menaxherja e ish-pilotit Sabine Kehm konfirmon për Motorsport-Magazin.com se ka bërë tashmë denoncimin.
Michael Schumacher qëndroi për muaj të tërë në gjendje kome pas aksidentit fatkeq në malet e Meribel.
“Shëndeti i Schumacher nuk është një temë publike, kështu që do të vazhdojmë të mos prononcohemi për këtë çështje. Duhet të mbrojmë sferën private të Schumacher,” është shprehur menaxherja./bw/a.k
