“Dikush kërkon të ndezë flakët e urrejtjes dhe përçarjes”- Ministri Demo bën bilancin e protestës: 156 të lënduar, mes tyre 97 efektivë policie dhe 4 të mitur!

Ministri Demo bën bilancin e katër ditëve protesta: 156 të lënduar, mes tyre 97 efektivë policie dhe 4 të mitur

Ministri i Punëve të Brendshme, Ervin Demo, ka bërë bilancin e katër ditëve të protestave të dhunshme në Tiranë, duke bërë të ditur se 156 persona kanë mbetur të lënduar si pasojë e përplasjeve.

Sipas tij, mes të lënduarve janë 97 efektivë të Policisë së Shtetit, 45 protestues dhe 12 kalimtarë të rastësishëm, ndërsa katër prej tyre janë të mitur.

Sipas ministrit, 97 nga të lënduarit janë punonjës të Policisë së Shtetit, të cilët kanë qenë në krye të detyrës për garantimin e rendit dhe sigurisë publike.

Po ashtu, janë lënduar 45 protestues dhe 12 kalimtarë, të cilët nuk kanë qenë pjesë e drejtpërdrejtë e përplasjeve.

Në një mesazh drejtuar qytetarëve, Demo u uroi shërim të shpejtë të gjithë të lënduarve dhe bëri thirrje për bashkim dhe dialog, duke dënuar përdorimin e dhunës si mjet për qëllime politike.

“Kemi më shumë arsye të bëhemi bashkë e të punojmë në të mirë të vendit, sesa të përleshemi për llogari të dikujt që kërkon të ndezë flakët e përçarjes dhe urrejtjes”, u shpreh ai.

Ministri veçoi edhe rastet e katër të miturve të lënduar gjatë protestave, duke shprehur shqetësimin për përfshirjen e tyre në akte të dhunshme. Ai iu drejtua prindërve me një apel të fortë që të mos lejojnë përdorimin e fëmijëve për qëllime politike.

“Përdorimi i të miturve në akte thellësisht politike dhe vënia në rrezik e jetës së tyre për hir të luftës për pushtet është një poshtërsi që duhet të dënohet nga e gjithë shoqëria”, deklaroi Demo.

Ai theksoi se gjatë gjithë situatës ka kërkuar nga forcat e policisë të tregojnë kujdes të veçantë ndaj të miturve dhe të veprojnë në përputhje me ligjin.

Ministri hodhi poshtë pretendimet se protestat e dhunshme përfaqësojnë studentët, duke nënvizuar se numri i studentëve të përfshirë në aktet e dhunës dhe mes personave të arrestuar është shumë i ulët.

“Kur themi se dhuna nuk ka të bëjë me studentët, nuk po bëjmë retorikë. Po refuzojmë të barazojmë studentët me ata që zgjedhin dhunën”, tha ai.

Në fund të reagimit të tij, Demo akuzoi organizatorët e akteve të dhunshme se po përpiqen të krijojnë destabilitet dhe të pengojnë rrugëtimin europian të Shqipërisë, ndërsa garantoi se institucionet do të vazhdojnë të ruajnë rendin publik.

“Shqipëria është nisur tashmë drejt destinacionit të saj europian dhe askush nuk do të mund ta ndalë zhvillimin dhe integrimin e vendit në Bashkimin Europian”, përfundoi ministri i Punëve të Brendshme.