Deputeti Ralf Gjoni ka folur sot për atë moment tensioni që u vu re dje nga kamerat në Kuvend, mes tij dhe kolegut Halit Valteri.
Teksa ka shpjeguar incidentin që ndodhi mes tyre, Gjoni tha se sipas tij është normale që të ketë acarime në Kuvend, pasi po diskutohen debate shumë të rëndësishme për zgjedhjet.
“Unë shoh veten time dhe nuk e kuptova se çfarë ndodhi, as se çfarë u pasqyrua. Nuk e kuptova agravimin e situatës dhe nuk e kuptoj pse duhet të bëhej lajm. Unë ruajta qetësinë se unë jam i fokusuar te reforma zgjedhore. Më shumë pati një keqkuptim të asaj që unë thashë.
Në çdo parlament të botës ke momente agravimi. Edhe parlamentin britanik, dy dyja palët janë përballë njëra-tjetrës dhe në tokë ke dy viza të gjata të kuqe. Këto vija nuk lejohen të kalohen dhe kanë largësinë e shpatës se dikur në parlament shkohej me shpata.
Unë e shoh se është normale që të ketë acarime momentale, pasi ne jemi duke debatuar për diçka shumë të rëndësishme, pasi bëhet fjalë për çfarë do të votohet nesër. Kjo ka të bëjë me themelin e demokracisë. Ne jemi deputetë ndryshe, pasi nuk i bindemi diktatit të partisë”, tha Ralf Gjoni në emisionin “Ditë e Re” në RTV Ora.
g.kosovari
