Partia Demokratike akuzoi shefin e Krimeve të Rënda në Dibër se po shpërndan para tek qytetarët, në këmbim të votës. Në një deklaratë për mediat, zëdhënësja e PD për Dibrës, theksoi se Admir Trupja dyshohet se para disa javësh ka marrë 28 mijë euro në këmbim të një sasie droge.
Ndaj, PD i ka bërë thirrje qytetarëve dibranë që të bëjnë arrestimin qytetar të Trupjes.
“Admir Trupja, shefi i krimeve të rënda në Drejtorinë e Policisë Dibër, po shpërndan lekë në këmbim të votave me një automjet 6 vendesh ngjyrë gri. Trupja dyshohet se para disa javësh ka marrë 28 mijë euro në këmbim të një sasie droge. Bashkëshortja e Trupjes është zyrtare e Bashkisë Dibër dhe anëtare e shtabit elektoral socialist. PD i ben thirrje prokurorisë të ndalojë në flagrancë shtetasin Trupja. PD i bën thirrje qytetarëve të bëjnë arrestimin qytetar të Admir Trupjes dhe të konfiskojnë paratë e drogës me të cilat po kryen krimin elektoral”, thuhet në deklaratën e Shtabit elektoral të PD-së.
Ndërkohë, në një deklaratë tjetër PD i ka bërë thirrje qytetarëve që të dalin në votime, ndërsa theksoi se nuk duhet të bjenë pre e shantazheve.
“Deri në këto momente që flasim, pjesëmarrja në zgjedhje është e kënaqshme. Qytetarët po vijojnë votimin normalisht. Unë ju bëj thirrje votuesve të dalin masivisht në votime pasi sot qytetarët e Dibrës kanë në dorë të vendosin për të ardhmen e tyre. Qytetarët e Dibrës kanë dëshmuar se përfaqësojnë vlerat e demokracisë, as nuk tremben, as nuk shantazhohen, as nuk blihen. Askush nuk e ndryshon dot vullnetin e tyre. Sot, çdo njeri prej nesh, qytetarëve të Dibrës, ka në dorë me votën e tij të bëjë ndryshimin e madh për Dibrën dhe për të ardhmen tonë. Të dashur bashkëqytetarë; Dilni masivisht dhe votoni me qytetari, me mençuri dibrane.”, deklaron zëdhënësja e Shtabit të PD-së.
BW/d.i.
