Deputetja e Partisë Demokratike, Jorida Tabaku, gjatë një interviste në emisionin “Kjo Javë” në News24, theksoi angazhimin e opozitës për garantimin e votës së diasporës dhe përmirësimin e ofertës ekonomike të PD-së, duke kritikuar qeverisjen aktuale të Partisë Socialiste.
Tabaku deklaroi se opozita ka pasur gjithmonë në fokus mundësimin e votës për shqiptarët që jetojnë jashtë vendit. “Ka ende vështirësi dhe teknikalitete, por PD e ka synim që çdo votues i diasporës të ndihmohet dhe të regjistrohet. Ne kemi votuar për mundësimin e votës për çdo shqiptar të larguar,” tha ajo.
Sipas Tabakut, ata që kanë emigruar në dekadën e fundit kanë refuzuar qeverisjen aktuale dhe duhet të kenë mundësinë ta refuzojnë atë edhe përmes votës.
Tabaku theksoi mungesën e një programi konkret nga Partia Socialiste dhe akuzoi qeverinë për një model të “kalbur ekonomik.” Ajo nënvizoi se Partia Demokratike do të vijojë të ofrojë ekipin dhe programin më të mirë ekonomik për vendin.
“Ajo që ne kemi bërë me ekspozimin e çdo afere apo bëme të viteve të fundit ka zbuluar modelin e dështuar që ka ngritur Partia Socialiste. PD do vijojë të ofrojë ekipin më të mirë me ofertën më të mirë ekonomike, duke dhënë mesazhin e ringritjes,” deklaroi Tabaku.
E pyetur për rolin e Sali Berishës, Tabaku vlerësoi ndikimin e tij në bashkimin e Partisë Demokratike. “Berisha, në mes të kësaj vështirësie, ka bashkuar 99% të PD-së. Nuk besoj se ka ndonjë rast tjetër si ky që i ndodhi PD-së,” përfundoi Tabaku.
