Dialogu Kosovë-Serbi ka humbur kuptimin duke u shndërruar edhe në mjet revanshi politikanëve nga të të dy shtetet.
Kështu është thënë në ditën e parë të konferencës për siguri, që po mbahet në Beograd, ku mes tjerash u diskutua edhe për dialogun e Brukselit, shkruan Koha Ditore.
Mungesa e rezultateve në dialogun Kosovë-Serbi dhe tensionet e ngritura së fundi kanë reflektuar edhe konferencën e Qendrës së Beogradit për Politika të Sigurisë.
Moderatori i panelit, Alex Roinishvili Grigorev, i cili është President i Këshillit për Qeverisje Përfshirëse ka shprehur nervozizmin e tij kur është dashur t’i prezantojë panelistët. Nga nëntë vetë sa kishte planifikuar t’i ketë përballë, ishin vetëm katër.
Mungonin katër përfaqësues nga Kosova të cilët vendosën ta bojkotojnë konferencën e organizuar nga Qendra e Beogradit për Politika të Sigurisë, për shkak se autoritetet serbe vazhdojnë ta mbajnë në paraburgim drejtorin e policisë për Mitrovicë, Nehat Thaçi, citohet Koha.
Dy zëvendës/ministrat e qeverisë, Ramadan Ilazi e Bajram Gecaj, deputeti Ilir Deda si dhe përfaqësuesi i “Vetëvendosjes”, Dukagjin Gorani, nuk ishin pjesë e panelit.
Por aty mungoi edhe drejtori i zyrës për Kosovë në qeverinë e Serbisë, Marko Gjuriq, edhe pse më herët kishte konfirmuar pjesëmarrjen.
Megjithatë Serbia u përfaqësua nga një zyrtare qeveritare dhe një nga parlamenti. I vetëm nga Kosova ishte Naim Rashiti, hulumtues. Pjesë e panelit ishte edhe Pierr Mirrel, Drejtori nderi në Komisionin Evropian. (b.an)
