Mediat ndërkombëtare shkruajnë se Leonardo DiCaprio do të prodhojë një film rreth skandalit të “Volkswagen”.
Mësohet, se kompania e tij e prodhimit “Appian Way” dhe “Paramount Pictures” kanë blerë të drejtat e një libri që po planifikon të shkruajë Jack Ewing rreth këtij skandali. Sipas medieve të huaja, libri i cili do të shkruhet nga gazetari i “New York Times”, raportohet të zbulojë se si ky skandal ka ndikuar në ndotjen e ambientit.
Ende nuk është bërë e ditur nëse DiCaprio do të luajë në këtë film. Kujtojmë, se muajin e kaluar, kompania gjermane kishte mashtruar me testet antindotje, duke manipuluar sasinë e emetimit të gazrave ndotëse.
