Policia ka ndaluar dy persona, kushërinj, të cilët dyshohen se kanë goditur me grushte dhe sende të forta shtetasin A. Gj., 52 vjeç, i cili ndodhet në spital, nën kujdesin e mjekëve.
Ngjarja ndodhi ditën e djeshme në lagjen “Gafurr Muço” dhe pas njoftimit të marrë, shërbimet e Policisë thonë se kanë ndërhyrë menjëherë duke arrestuar në flagrancë autorët e dyshuar.
“Ditën e djeshme, pas njoftimit të marrë se në një lokal në lagjen ‘Gafurr Muço’, 2 shtetas kanë ushtruar dhunë ndaj një shtetasi tjetër, menjëherë në vendngjarje kanë shkuar shërbimet e Policisë të cilat bënë të mundur kapjen dhe arrestimin në flagrancë të 2 autorëve të dyshuar.”, bën me dije policia.
Më pas në njoftim thuhet se në përfundim të hetimeve paraprake, “specialistët për Hetimin e Krimeve të Komisariatit të Policisë Lushnjë arrestuan në flagrancë shtetasit E. Zh., 35 vjeç dhe M. Zh., 31 vjeç, banues në fshatin Qerret i Ri, pasi dyshohet se për motive të dobëta kanë goditur me grushte dhe sende të forta shtetasin A. Gj., 52 vjeç, banues në fshatin Jeta e Re.”
I dëmtuari ndodhet aktualisht në spital, nën kujdesin e mjekëve.
