Dhunoi ish-gruan, pranga babait të vëllezërve Aliko
Babai i dy vëllerzvë Aliko që janë arrestuar si të dyshuar për sulmin e armatosur të 24 qershorit dhe vrasjen e efektivit të RENEA-s, Ibrahim Basha, ka përfundur edhe babai i tyre. Policia e Gjirokastrës deklaroi dje se ka arrestuar të kërkuarin Adil Aliko, 48 vjeç, teksa kthehej nga Greqia, ku ishte fshehur për një javë pas ngjarjes. Ngjarja ka ndodhur më 28 gusht, në vilën ku familja Aliko banon, teksa burri dhe gruaja jetonin në kate të veçanta pas ndarjes. “Adil Aliko u arrestua nga Policia Kufitare e Kakavijës, ndërsa po kthehej nga Greqia, pasi ishte shpallur në kërkim për ushtrimin e dhunës fizike dhe psikologjike ndaj ish-bashkëshortes së tij me inicialet R.P., më 28 gusht të këtij viti”, bënë me dije burimet zyrtare. Nga hetimet e kryera rezultoi se ishin pikërisht mosmarrëveshjet dhe sjelljet e dhunës nga ana e Adil Alikos që çuan në ndarjen e çiftit. Ish-bashkëshortja e 48-vjeçarit nga Lazarati bëri kallëzimin në polici në episodin e fundit të dhunës më gusht të këtij viti dhe menjëherë Gjykata e Gjirokastrës lëshoi urdhër ndalimin për Alikon, i cili ishte larguar në shtetin fqinj. Arrestimi i tij u bë sapo ai shkeli në tokën shqiptare, më 3 shtator, në pikën kufitare të Kakavijës. Ndaj Adil Alikos rëndon akuza e “dhunës në familje”, ndërsa për ish-bashkëshorten e tij gjykata ka lëshuar urdhër mbrojtjeje dhe që kryefamiljari të mos i afrohej apo ta prekte. Aliko do të dalë para gjykatës për masë sigurie, ku pritet të kërkojë masë më të butë dhe lirim. Adili është babai i dy vëllezërve Arbjon dhe Alban Aliko, tashmë të arrestuar dhe nën proces hetimor nga Prokuroria e Krimeve të Rënda për shumë akuza, nga kultivimi i drogës, aktet terroriste me lëndë eksplozive, sulm ndaj policisë me tritol, shkatërrim prone dhe së fundmi vrasjen e efektivit Basha dhe plagosjen e dy policëve të tjerë. Ata akuzohen se drejtuan grupin e armatosur në sulmin e 24 qershorit për të rikthyer “Republikën” e drogës në Lazarat. Adil Aliko ishte një nga negociatorët që bindi djemtë e tij të dorëzoheshin, teksa ata pretendonin se nuk ishin personat që vranë policin.
