Kreu i Partisë Demokristiane, Nard Ndoka, përmes një statusi në Facebook ka denoncuar atë që ka cilësuar si një hakmarrje dhe një dhunim nga qeveria, i konkretizuar në sekuestron e selisë së partisë së tij dhe të dy partive të tjera opozitare, Partia Republikane dhe PBDNJ.
Sipas tij, “Avokati i Shtetit në mënyrë arbitrare sekuestron zyrat dhe merr peng të gjithë dokumentet e dy partive politike PDK e PR, ndërsa Policia e Shtetit nxjerr në rrugë PBDNJ. Kemi informuar zyrtarisht Presidentin e Shqipërisë, Kryeministrin e Shqipërisë (megjithëse ky është urdhëruesi i plaçkitjes), institucionet ndërkombëtare në vend, OSBE, BE e SHBA-të. Dhunimi barbar i zyrave të tre partive politike, pengmarrja e dokumentacionit dhe arkivave, shenja të një pushteti arrogant e kriminal, që kërkon asgjësimin e pluralizmit politik”.
Sipas liderit politik, çështje që ka nisur prej gati 5-6 muajsh. Prej vitesh, këto subjekte qëndrojnë në disa zyra në pronësi të Kuvendit, por sipas Ndokës i është bërë e ditur se do të transferohen në ambiente të tjera, por sipas tij nuk ka ndodhur kështu.
/e.d
