Kryeministri irlandez Simon Harris e quajti dhunën “të dënueshme” pasi një turmë u mblodh jashtë një vendi të caktuar për strehimin e azilkërkuesve dhe filloi të sulmonte oficerët e policisë.
Protestuesit kundër emigracionit në Dublin kanë sulmuar oficerët e policisë dhe kanë djegur automjetet pranë një godine që do të shërbejë si strehë për azilkërkuesit.
Dhuna shpërtheu të hënën teksa bëheshin përgatitjet për ta kthyer një fabrikë bojërash të papërdorur në strehimore, me videot në rrjetet sociale që treguan kamionë e fadroma në flakë.
Protestuesit, disa me fytyrë të mbuluar, u mblodhën në mëngjes dhe u ndezën një sërë zjarresh. Dhuna u përshkallëzua pasi tulla dhe fishekzjarrë u hodhën mbi zyrtarët dhe kazanët e dyshekët u dogjën.
Kryeministri irlandez Simon Harris tha se skenat e dhunës janë të dënueshme.
“Asnjë person nuk ka të drejtë të djegë makina, të dëmtojë pronën ose të sulmojë anëtarët e sigurisë dhe shërbimeve të emergjencës. Një roje sigurie u sulmua sepse thjesht kishte bërë punën e tij. Këto veprime janë kriminale dhe janë krijuar për të mbjellë frikë dhe përçarje“, tha Harris.
Policia arrestoi 15 persona, mes tyre edhe dy gra, të cilët dolën natën vonë në një seancë në Gjykatën Penale të Drejtësisë të hënën, pasi mbi ta rëndon akuza për një sërë shkeljesh të rendit publik.
