Përditësuar 22:30 – Lulzim Basha e ka refuzuar thirrjen e SHBA për të ndalur aktet e dhunës ndërsa e ka orientuar turmën drejt Drejtorisë së Policisë Tiranë.
“Me urdhër të Edi Ramës dhe Sandër Lleshajt është dhunuar në mënyrën më barbare të mundshme.
Është shoqëruar në drejtorinë e policisë.
Ju bëj thirrje gjithëve ju që të na ndiqni në drejtim të Policisë së Tiranës”, tha Basha.
Pas Kryeministrisë, Kryesisë së Kuvendit dhe Parlamentit, militantët e opozitës joparlamentare kanë sulmuar me mjete të forta, fishekzjarre dhe mjete pirro-teknike godinën e Drejtorisë së Policisë Tiranë.
***
Forcat e Policisë kanë arritur të shpërndajnë një grup militantësh që sulmonin Kuvendin me fishekzjarre dhe mjete të forta.
Ka qenë ndërhyrja e FNSH dhe e autobotëve me ujë që ka trembur protestuesit e mbetur nga PD dhe LSI.
Ndërkohë që Uashingtoni ka reaguar ashpër përmes rrjeteve sociale.
Ambasada Amerikane u bën apel drejtuesve të opozitës, që të ndalojnë aktet e dhunës. Sipas SHBA, kjo nuk shkon paralel me atë çfarë deklaron opozita: Demokracinë.
“Ambasada e SHBA dënon dhunën e pranishme gjatë protestës së sotme.
Objektivi i deklaruar i opozitës për ta bërë demokracinë e Shqipërisë më të fortë shkon kundër dhunës që është duke u ushtruar nga protestuesit.
Dhuna është thelbësisht jodemokratike dhe duhet të ndalojë.
Drejtuesit e protestës kanë përgjegjësinë të nxisin qetësi.
Iu bëjmë thirrje të gjitha palëve që të tregojnë vetëpërmbajtje” – thuhet në deklaratë.
