Portlandi është bërë një pikë e ndezur e demostratave kundër brutalitetit të policisë dhe racizmit që nga plagosja e afro-amerikanit Jacob Blake si dhe vrasja e një 17-vjeçari javën e kaluar.
Një ditë më parë një djalë i ri që mendohet se ishte pjesë e grupimeve të ekstremit të djathtë humbi jetën gjatë përplasjeve mes atyre që mbështetin Presidentin amerikan Donald Trump dhe protestuesve anti-racistë.
Presidenti amerikan Donald Trump dhe rivali i tij demokrat Joe Biden janë përplasur për dhunën që ka shpërthyer në protestat në Portland dhe Kenosha.
Trump fajësoi kryetarin demokrat të Portlandit, Ted Wheeler, se ka lejuar që të zhvillohen trazira dhe po shkatërron qytetin. Nga ana tjetër, presidenti amerikan ka deklaruar se ardhja e Biden në pushtet do të sjellë edhe më shumë dhunë dhe kaos në Shtetet e Bashkuara të Amerikës.
Rendi dhe ligji është një temë kryesore e presidentit Trump që u përdor edhe gjatë fushatës presidenciale. Nga ana tjetër, kandidati për president Joe Biden e ka cilësuar kreun e Shtëpisë së Bardhë si inkurajues të dhunës.
Demokratët edhe më herët kanë deklaruar se dhuna që po ndodh në shumë qytete në SHBA, është krijuar si pasojë e retorikës së gabuar që Trump po përdor kundrejt komunitetit afro-amerikan.
Ndërkaq, drejtori ekzekutiv i rrjetit më të madh social Facebook, Mark Zuckerberg është shprehur se një javë më parë një grup i armatosur po planifikonte që të hynte në Kenosha dhe të shkaktonin trazira.
Grupi “Garda e Kenoshës” i bënte thirrje edhe njerëzve të tjerë që të bashkoheshin kundër policisë. Zuckerberg, nëpërmjet një video–live, është shprehur se ky është ishte një gabim shumë i madh që kompania lejoi një grup të tillë që të shkaktonte kaos.
Së fundmi, Facebook ka miratuar rregullore të reja për të hequr ose kufizuar postime nga grupe që përbëjnë kërcënim për sigurinë publike.
/a.r
