Protestën e të shtunës, Dashamir Shehi e cilësoi paqësore, pavarësisht se pati edhe skena dhune.
Dashamir Shehi e cilësoi si protestën e 16 shkurtit si paqësore, teksa duke bërë një paralelizëm me vrasjet e 21 janarit, ai thekson se vrasja e tyre ishte një gabim.
Nga ana tjetër, teksa u pyet për dhunimin e Kryeministrisë nga protestuesit ditën e shtunë, Shehi tha se duhej pak dhunë që të shkruanin dhe mediat ndërkombëtare.
“Më 21 janar është gabim i madh që u qëllua.
Ishte një gabim i madh i policisë, gardës.
Policia veproi absolutisht më mirë dhe duhet të vepronte, sepse përndryshe i bie që kemi mbetur në vend.
Madje filloi me lule dhe si gjithë demonstrimet masive pati edhe dhunë”, tha Shehi, në studion e “I Ftuari” në A2.
“Madje nga kjo pikëpamje them se mund të ketë qenë edhe pak e vlefshme, sepse protesta u komentua nga mediat ndërkombëtare, dhe po të mos kishte qenë ato tymnaja, nuk do të ishin marrë me ne seriozisht.
Bota interpreton numrat. Një protestë ka vetëm një mesazh të madh thelbësor, numri”, tha ai.
Shehi e quajti të rrezikshëm vendimin e kryeministrit Rama për të zhvilluar, siç e cilësoi ai, një anti-miting në Vlorë, pikërisht në ditën që opozita kishte paralajmëruar protestë para godinës së zyrës së tij.
“E patë shfaqjen e shëmtuar që u bë në Vlorë? Njëlloj si Maduro. Donte të sfidonte protestën e opozitës.
Zgjodhi Vlorën, ku ka nisur ’97-ta, dhe një bastion i të majtës.
Por kjo i hap një spirale të dëmshme Shqipërisë. Rama nuk e vret mendjen se çfarë efekti bën kjo”, tha Shehi.
