Presidenti Hashim Thaçi ka reaguar ndaj sulmit që i ka ndodhur Arbana Xharrës. Ka thënë se dhuna nuk bën të jetë mjet i shprehjes së pakënaqësisë.
Sidoqoftë, ai ka kërkuar zbardhjen e rastit dhe dënimin e sulmuesve
Reagimi i plotë i Presidentit:
Jam thellësisht i tronditur dhe i shqetësuar me sulmin kundër Arbana Xharrës. Është krejtësisht i papranueshëm dhe i dënueshëm përdorimi i dhunës dhe asgjë nuk e arsyeton atë.
Si shoqëri nuk bën të lejojmë që dhuna të bëhet mjet i shprehjes së pakënaqësisë sonë.
Me këtë sulm të ulët nuk janë cenuar vetëm Arbana dhe familja e saj, por edhe parimet dhe vlerat demokratike mbi të cilat po e ndërtojmë shoqërinë tonë.
Organet e rendit duhet ta zbardhin në tërësi rastin dhe t’i sjellin sulmuesit para drejtësisë. HTH
Mustafa
Kryeministri i Kosovës, Isa Mustafa ka reaguar ndaj sulmit që i është bërë anëtares më të re të PDK-së, Arbana Xharra, e cila u sulmua dje në afërsi të banesës së saj, përkatësisht në parking, pasi u kthye nga Tirana.
Mustafa ka thënë se sulmi ndaj Arbana Xharrës është akt i ulët dhe i turpshëm. Ai ka shkruar se kryesit e kësaj vepre duhet të sillen para drejtësisë, transmeton Express.
“Sulmi mbi Arbana Xharrën është akt i ulët dhe i turpshëm. Kryerësit duhet të sillen para drejtësisë. IM”.
Arbana Xharra u sulmua gjatë natës, pranë banesës së saj në Prishtinë, dhe më pas u dërgua në QKUK për trajtim mjekësor. Gjendja e saj thuhet se është stabile, megjithatë, ende nuk dihet se kush e kreu sulmin ndaj saj.
LDK
Anëtari i LDK-së, Valon Murtezaj, ka dënuar rrahjen e anëtares së re të PDK-së, Arbana Xharra, që ndodhi mbrëmë në mesnatë.
“Shoqëria e Kosovës nuk duhet ta pranojë dhunën, dhe nuk do ta pranojë”, ka thënë Murtezaj.
“Dënojmë sulmin ndaj znj. Xharra, dhe çdo lloj akti të dhunës, ndaj çdokujt”, ka shkruar ai në Facebook.
Bindjet politike sipas tij janë personale dhe duhet te respektohen.
Anëtarja më e re e Partisë Demokratike të Kosovës, Arbana Xharra është sulmuar sot rreth orës 01:00 pas mesnate
E tërë ngjarja thuhet se ka ndodhur rreth orës 1 pasmesnatës kur Xharra ishte kthyer nga Tirana, ku ishte ftuar në emisionin “Oktapod” të Turjan Hyskajt që transmetohet në Vizion Plus.
Ajo u dërgua në gjendje të rëndë në spital ku ishte tërësisht e mbuluar, ndërkohë motivet e kësaj ngjarje ende mbeten të paqarta.
Hoxhaj
Ministri i Jashtëm ka reaguar ndaj sulmit që iu është bërë anëtares më të re të PDK’së, Arbana Xharra.
Xharra u sulmua gjatë natës, pranë banesës së saj në Prishtinë, dhe më pas u dërgua në QKUK për trajtim mjekësor.
Ministri Hoxhaj bën thirrje për dënimin e sulmuesve të Arbana Xharrës, dhe përmes këtij statusi, ministri bën me dije që shteti ka dështuar ta mbrojë një grua që t’i thotë mendimet ndryshe.
“Thellësisht i tronditur nga sulmi qyqar ndaj Arbana Xharrës. I shokuar nga ajo që mund ti ndodhë një gruaje, një nëne dhe mbi të gjitha një aktiviste të guximshme në tërë këto vite që nuk ka hezituar ti thotë hapur dhe pa frikë gjërat të cilat i mendon. Kemi dështuar të tërë që nuk kemi mbrojtur një grua e cila i thotë mendimet ndryshe. Jo toleranca jonë ndaj njerëzve që nuk pajtohemi me ta po na shtyn drejt këtyre ngjarjeve të papranueshme. Mjaft më! Të bashkëndjejmë të gjithë. Ta dënojmë të gjithë! Sulmuesit para drejtësisë. Arbana, shërim të shpejt!”, shkruan Hoxhaj.
