19 organizatat më të mëdha të biznesit vendas dhe të huaj në Shqipëri kërkojnë mos-miratimin nga Kuvendi të ligjit “Për dhomat e tregtisë dhe industrisë”. Përmes një letre të hapur drejtuar kryetarit të Kuvendit Ilir Meta dhe krerëve të grupeve parlamentare, organizatat e biznesit kanë rënditur 5 problematikat e ligjit.
19 organizatat më të mëdha të biznesit vendas dhe të huaj në Shqipëri theksojnë se:
1. Rregullimi ligjor në lidhje me detyrueshmërinë e anëtarësimit në Dhomat e Tregtisë dhe Dhomat e Bashkuara të Tregtisë Përbën Një Shkelje Kushtetuese referuar nenit 46 të Kushtetutës”, pika 1 e cila e përcakton pjesëmarrjen në organizime shoqatash dhe organizatash si të drejtë të qytetarëve dhe jo si detyrim.
2. Anëtarësimi absolut i detyrueshëm me anë të pagesës së kuotës së anëtarësisë në dhomat e tregtisë nga të gjithë personat fizikë dhe juridikë Krijon Një Taksë Të Fshehtë Për Biznesin në kushtet që subjektet tregtare kanë vështirësi në realizimin e fitimeve.
3. Ligji Nuk ofron asnjë qartësi në lidhje me llojin dhe cilësinë e shërbimit të Dhomës së Tregtisë apo të Bashkimit të Dhomave të Tregtisë dhe Industrisë së Shqipërisë për anëtarët që do të anëtarësohen në mënyrë të detyrueshme dhe do të paguajnë kuotën e detyrueshme, apo rregullat dhe parimet mbi bazën e të cilave do të promovohen, lobohen dhe mbrohen interesat e anëtarëve të dhomave. Gjithashtu, ky ligj nuk përcakton se çfarë pasojash ka për subjektet që nuk anëtarësohen në mënyrë të detyrueshme.
4. Referuar prognozës së bërë në mbledhjen e të ardhurave në mënyrë të detyrueshme nga të gjitha subjektet, misioni dhe përcaktimet ligjore në lidhje me aktivitetin e dhomave të përcaktuara në këtë ligj nuk e justifikojnë përfitimin e të ardhurave në atë nivel, i cili mund të ishte lehtësisht i krahasueshëm me buxhetin e një ministrie apo institucioni tjetër të rëndësishëm.
5. Çdo favorizim i dhomave të tregtisë përbën një diskriminim të shoqatave të tjera të biznesit në cënim të nenit 18 të Kushtetutës.
Sipas organizatave të biznesit, nuk duhet të miratohet një ligj që shumica e individëve dhe bizneseve e kundërshtojnë dhe që ngarkon biznesin me një “taksë” vjetore. /ma.me
