Dhoma Amerikane e Tregtisë e konsideron moment historik ardhjen e investitorëve të mëdhenj amerikanë në Shqipëri: njëri për ndërtimin e hidrocentralit të Skavicës dhe tjetri për të operuar TEC-in e Vlorës, por presidenti i kësaj Dhome kërkon nga ana administratës tatimore luftë ndaj informalitetit, e cila do të vendoste barazi dhe eliminim të konkurrencës së pandershme.
“Ne mendojmë se kjo është një situatë që duhet adresuar jo vetëm me fushata por një ndryshim rrënjësor të sistemit i cili do inkurajonte bizneset të cilët nuk kanë sot motivimin e duhur që të formalizohen.”
Luftën ndaj informalitetit, Drejtoria e Tatimeve e sheh të realizuar me implementimin e fiskalizimit, që është hedhja në kohë reale në sistem të shitjeve të çdo biznesi.
“Angazhimet për monitorimin dhe deklarimin e llogarive të biznesit të ndërthurura edhe me nismën e fiskalizimit këtë vit, do të arrijnë që të ndryshojnë qasjen e tonë, por dhe rezultatet në luftën kundër informalitetit.”
Bizneset amerikane kërkojnë që t’u jepet fund vonesave me rimbursimin e TVSH-së, madje propozuan që të aplikohen kamata për administratën tatimore.
“Ose zgjatini afatet dhe thoni për 60 ditë dhe jo 30 ditë, ose vendosni sistem kamate, sepse vonesat e rimbursimit të TVSH-së vazhdojnë.”
“Ne do të bëjmë aplikimet online dhe do të gjurmojmë nga sistemi vonesat.”
Investitorët e huaj kërkuan që ligjet fiskale të mos ndryshojë në mënyrë kaq të shpeshtë, ndërsa sistemet tatimore të modernizohen dhe të jenë në përputhje me standardet ndërkombëtare./A.P
