Regjisori Dhimitër Anagnosti ka festuar dje 80-vjetorin, në një ceremoni të organizuar nga Qendra Kombëtare e Kinematografisë dhe Arkivi Qendror Shtetëror i Filmit, shkruan Gazeta Shqiptare.
Njeriu që që u ka dhënë jetë filmave si ”Komisari i dritës”, “Dueli i heshtur”, “Kthimi i ushtrisë së vdekur”, “Përrallë nga e kaluara”, “Gurët e shtëpisë sime”, “Vëllezër dhe shokë”, “Në shtëpinë tonë”, “Monumenti”, “Lulëkuqet mbi mure”, “Kur hiqen maskat”, “Vëllezër dhe shokë”, “Gurët e shtëpisë sime”, “Gjoleka, djali i Abazit”, dje vetëm falënderoi të pranishmit. I tërhequr, ai priti çdo fjalim me buzëqeshje dhe me heshtje. Në fund, kur kujtimet e lavdet mbaruan, ai nuk e fshehu kënaqësinë për praninë e madhe në festë, përmbledhur edhe në fjalët e së shoqes, Roza Anagnosti: “Një kënaqësi e madhe se nuk është harruar dhe respektohet ende”.
I cilësuar si një prej regjisorëve më të rëndësishëm të vendit, Anagnostit i numërohen në karrierën 40-vjeçare, 15 skenarë, 14 filma artistikë, 10 dokumentarë dhe disa çmime kombëtare e ndërkombëtare. Artisti i Popullit” dhe “Nderi i Kombit” lindi në vitin 1936 në Vuno. “Këta njerëz që kanë punuar në filmat tanë dua t’i përshëndes. Jeta jonë ka qenë komunikuese, dashamirëse. Nuk kemi pasur grindje, sepse secili kishte veprën e vet dhe e ndihmonim njëri-tjetrin. Kemi nostalgji – në këtë kohë që erdhi na duhet letër e laps të shkruajmë e të lëmë ndonjë gjë. Ju faleminderit që bëmë këtë takim. Le të jetë një ditë gazi e humori”, tha kineasti. Ndërkaq, Roza Anagnosti recitoi vargje nga të tijat.
Në ceremoni ishte e ftuar edhe ministra e kulturës, Mirela Kumbaro, e cila e quajti Anagnostin “pasuri e paçmuar kombëtare që urojmë ta kemi sa më gjatë mes nesh”.
Pirro Milkani, në emër të Forumit të Kineastëve, i dhuroi Anagnostit, një pikturë me pamje të Vunoit, realizuar nga Ksenofon Dilo. “Do kisha dëshirë që të kishim ata që na mungojnë, si Viktor Gjika dhe Saim Kokona”, tha Milkani, duke kujtuar se ishte Gjika ai që e lidhi me Anagnostin para 60 vitesh. “Ata ishin në Moskë. Më pas, u njohëm në Tiranë më 1961. Unë, Viktor Gjika dhe Saim Kokona kemi kontribut që e bashkuam këtë çift(thotë duke iu drejtuar Roza dhe Dhimitër Anagnostit). Më lejoni t’ua kujtoj: Roza Xhuxha bëri një rol të vogël me recitim. Por rolin e parë e bëri me tre vetë: me Kristaq Dhamon, Viktor Gjikën dhe Pirro Milkanin. Një ditë të tërë i kushtuam xhirimit të atij episodi te ‘Detyrë e posaçme’, se e dinim si do ndodhte”, tha Milkani, duke nisur të tregojë njohjen e çiftit. Regjisori i njohur tregoi se punuan me diga, me karbon dhe me drita. “Shkoi aq bukur, sa kur u shfaq filmi, ne pamë me bisht të syrit që të pëlqeu (i drejtohet Dhimitrit). ‘Pyete kush është ajo vajzë’ (për Rozën), dhe ne e morëm edhe te filmi ‘Toka jonë’”, rrëfen Milkani, duke treguar edhe një detaj tjetër. “Erdhi Saim Kokona e më thotë: Taqo me Rozën, u ngatërruan. Kur e pyeta nga e di, më tha se ai i kishte marrë pantallonat borxh që të dilte të takonte Rozën”, kujtoi Milkani, duke sjellë të qeshura e duartrokitje nga të pranishmit.
Balkanweb
