Sokol Sanxhaktari, dhëndri i kryebashkiakut të Elbasanit Qazim Sejdini, është pyetur në policinë e këtij qyteti si person që ka dijeni mbi rrethanat e ngjarjes së ndodhur në muajin Shtator 2017 mes policisë dhe disa personave, ku katër prej tyre tashmë janë arrestuar nga uniformat blu dhe prokuroria e Krimeve të Rënda.
Ndryshe nga sa raportohet në media se ai është thirrur sot dhe ka refuzuar të dëshmojë pasi s’kishte avokatin e tij mbrojtës, një burim pranë Prokurorisë së Krimeve të Rënda i tha gazetës “Shqiptarja.com” se Sanxhaktari nuk ishte thirrur për tu pyetur.
“…Ne nuk kemi asnjë çështje të regjistruar kundër këtij personi dhe se nuk e shikojmë deri në këto momente ta pyesim. Ky person është shoqëruar në policinë e Elbasanit dhe ka dhënë deklarimet e tij që në muajin shtator 2017 për këtë ngjarje, deklarime këto që janë administruar në dosjen hetimore…”-thanë burimet. Mësohen se Sanxhaktari ka dhënë shpjegimi mbi vendndodhjen e tij, në momentin kur ka ndodhur ngjarja.
Ndërkohë gazeta “Shqiptarja.com” komunikoi dhe me avokatin Eno Bushi, i cili pohoi se nuk ka asgjë të vërtetë që Sokol Sanxhaktari të jetë pyetur në prokurori për këtë çështje. Bushi sqaroi se ai vetë ka qenë sot në gjykatën e Apelit ku ka përfaqësuar tre të arrestuarit e tjerë për këtë ngjarje dhe askush nga prokuroria nuk e kishte njoftuar për këtë seancë pyetjesh me shtetasin Sokol Sanxhaktari.
ma.me
