Gjyqtarja e Shkodrës që jetonte në Tiranë, 39-vjeçarja Fildese Hafizi, u ekzekutua me dy plumba nga ish-bashkëshorti i saj, në një ngjarje të dy ditëve më parë që tronditi mbarë opinionin publik.
I dalë nga burgu prej pak muajsh për armëmbajtje pa leje, 53-vjeçari Fadil Kasemi, priti rreth një orë që ish-bashkëshortja e tij të linte parukerinë pranë lagjes ku jetonte tek “Xhamlliku” në kryeqytet, për ta qëlluar më tej me dy plumba vdekjeprurës. E frikësuar nga ish-burri i cili e kishte dhunuar dhe kishte tentuar ta vriste edhe më parë, Fildes Hafizi ka shkuar me shpejtësi në makinën e saj, por nuk ka mundur ta ndezë dhe të largohet, pasi 53-vjeçari e qëlloi me plumba nga xhami duke e lënë të pajetë, gruan me të cilën ka dy fëmijë.
Gazeta Shqiptare shkruan sot se të vetmet fjalë që Fildesi ka thënë pasi ka kuptuar se ish-bashkëshorti do e vriste, ishin: Mos më merr në qafë.
Një bisedë të fundit me gjyqtaren ka rrëfyer edhe vajza në parukerinë ku Fildes Hafizi kishte shkuar për të rregulluar thonjtë.
“Dëgjova krismat. Në fillim mendova se nuk ishin të shtëna me armë. Por, kur dola në derë të shihja, u trondita. Pashë të gjakosur në makinë klienten time”, thotë ajo.
E tronditur nga skena e rëndë, e reja e cila nuk deshi të identifikohej me emër tha se Dezi ishte kliente e saj dhe vetëm pak sekonda para ngjarjes kishte qenë aty.
“Ishte kliente këtu. Erdhi bëri thonjtë. E dija që ishte banore këtu pranë, por asnjëherë nuk i kam ditur me detaje problemet që kishte pasur me të shoqin”, tha ajo.
Ndërsa, përsa i përket momentit kur ndodhi ngjarja, vajza tha se nuk kishte parë gjë, pasi derën e sallonit të bukurisë e mbante të mbyllur.
“Nuk e pash se si ndodhi ngjarja, sepse unë e mbyll gjithmonë derën kur punoj. Edhe kur Dezi doli që këtu, e mbylla sërish, sepse kisha njerëz. Vetëm kur pas disa sekondash dëgjova krismat. Kur dola në derë të shihja çfarë ishte dhe kur pashë atë lloj situate, u tmerrova. E përjetova shumë keq”, rrëfeu ajo. Po ashtu, vajza tregoi edhe për bisedën që kishte kryer me të përgjatë një ore.
“E dija që ishte gjyqtare. Po flisnim për punën në përgjithësi. Ajo ishte një zonjë e vërtetë, e përkushtuar në profesionin e saj, për veten, për fëmijët dhe për familjen e saj”, përfundoi ajo.
53-vjeçari pasi qëlloi për vdekje ish-bashkëshorten u largua menjëherë prej aty për t’iu arratisur policisë. Prej andej, autori ka parë të parkuar një furgon mallrash dhe menjëherë ka hipur në të duke kërcënuar shoferin me pistoletë në kokë që të ecte dhe ta çonte në periferi të Tiranës. Sipas burimeve, drejtuesi i mjetit, i frikësuar nga kjo situatë ka ndezur makinën dhe pasi ka bërë disa metra rrugë, në afërsi të komisariatit nr.1 ka parë një patrullë policie. Ka hapur krahun dhe ka zbritur menjëherë dhe ju është drejtuar uniformave blu: “Kapeni personin që kam në makinë, ai ka armë me vete, mund të jetë vrasësi”. Pas kësaj, oficerët e policisë kanë bërë shoqërimin e tij, ku rezultoi të ishte autori i vrasjes së rëndë. Me vete iu gjet edhe arma e krimit. 53-vjeçarit i është bërë edhe testi i alkoolit, i cili ka rezultuar 0.045%. /b.d
