Biznesmeni i ndërtimit që i shpëtoi dje atentatit, u qëllua ndërsa kthehej në banesë dhe ishte në prani të gruas. Lulëzim Kazani, ndërtuesi 56-vjeçar është plagosur me dy plumba, në afërsi të banesës së tij te “Komuna e Parisit” në rrugën “Medar Shtylla”. Ngjarja ndodhi rreth orës 21:00.
Ai ka qenë me gruan në makinë, duke ecur për në banesë, kur i kanë dalë përpara dy persona që i kanë zënë rrugën.
Në mënyrë ballore ata kanë qëlluar me një armë automatike. Si pasojë e sulmit me armë, biznesmeni është qëlluar me dy plumba, njëri prej tyre e ka prekur atë në pjesën barkut dhe tjetri në këmbë raporton Panorama.
Disa gjurmë plumbash kanë mbetur edhe në makinën e biznesmenit, ndërsa mendohet se autorët e krimit, nga frika se mos kapeshin nga policia, janë larguar me vrap. Sipas Policisë, dy autorët e ngjarjes dyshohet se kanë fshehur armët poshtë rrobave dhe janë larguar pa lënë asnjë gjurmë.
Mjekët kanë thënë mbrëmë se biznesmeni është jashtë rrezikut për jetën. Për këtë arsye, grupi i hetimit ka shkuar mbrëmë në spital dhe ka marrë në pyetje 56- vjeçarin. Ai ka thënë se autorët kanë qenë dy persona, por nuk ka arritur t’i shohë me imtësi apo t’i njohë edhe për shkak të errësirës.
Ndërkohë në polici është shoqëruar edhe gruaja e biznesmenit, e cila është marrë në pyetje nga grupi i hetimit. Ajo ka pranuar se i shoqi kishte konflikte pronësie, por pa dhënë detaje.
Biznesmeni i plagosur mbrëmë rezulton se ka disa procese gjyqësore të hapura në gjykatat shqiptare. Objekti i këtyre padive, veç të tjerash, në një rast është edhe përpjesëtimi i pasurisë në lidhje me një pronë 1244 metra katrorë në Tiranë.
