Të tjera detaje mësohen nga plagosja me armë zjarri që ndodhi mesditën e të shtunës në Vlorë. Sipas informacioneve nga grupi hetimor në Vlorë, mendohet se mes autorit dhe studentes së plagosur ka patur lidhje të mëparshme dashurie.
Përfundimi i lidhjes mes tyre duket se nuk është pranuar nga autori i dyshuar, Fadil Nikaj 30 vjeç nga Shkodra. Vajza e plagosur, Kostandina Z. 20 vjeç nga Berati dhe studente në Vlorë u qëllua me armë në mes të qytetit nga autori. Dëshmitarë nga vendngjarja tregojnë se mes tyre ka patur fillimisht debat dhe autori më pas nxorri pistoletën duke e qëlluar.
Burime nga policia thonë se për të trembur 20-vjeçaren, Fadil Nikaj kishte marrë me vete edhe dy granata dore. Njëra nga granatat u gjet në ambientet e lokalit ku ndodhi ngjarja, pasi i kishte rënë autorit. Ndërsa granata e dytë u gjet në çantën e tij. Të dyja u sekuestruan nga policia. Po kështu edhe arma e krimit, tip pistoletë.
30-vjeçari Fadil Nikaj u arrestua në vendngjarje nga forcat “Shqiponja”, pasi ishin qytetarët të cilët lajmëruan menjëherë policinë. Nikaj ndodhet në Drejtorinë e Policisë së Vlorës ku po merret në pyetje. Mësohet se 30-vjeçari nuk është person me precedent penal.
/m.j
