Prej disa muajsh, Ervin Dalipaj qëndronte i fshehur në disa banesa mes Tiranës dhe Durrësit, shkruan “Panorama”.
Ai ishte shpallur në kërkim si person i akuzuar për rrëmbimin dhe vrasjen e Gazmend Çollakut, ngjarje për të cilën gjykohej në mungesë pranë Krimeve të Rënda.
Ervin Dalipaj lëvizte i armatosur për faktin se jo vetëm që ishte në kërkim nga policia, por ishte edhe në vëzhgimin e njerëzve të Gazmend Çollakut, për të cilin 38- vjeçari akuzohet se e kishte rrëmbyer në bashkëpunim me Denis Shtrazën.
Grupi hetimor i ngritur për ngjarjen e dy ditëve më parë ku mbeti i vrarë ish-shefi i Policisë së Tiranës, Ervin Dalipaj dhe miku i tij Xhino (Juxhin) Dautaj, ka dalë në përfundimin se në atentatin e organizuar kanë marrë pjesë dy grupe në dy makina.
Pistat
Ekspertët e grupit hetimor, pas kryerjes së hetimeve fillestare, kanë ngritur dy pista hetimi: vrasje për larje hesapesh dhe hakmarrje.
Këto dy pista janë ngritur paraprakisht duke marrë parasysh të kaluarën e dy viktimave, të cilët dyshohen për vrasje, Ervin Dalipaj për rrëmbimin dhe më pas ekzekutimin e Gazmend Çollakut, ndërsa Xhino Dautaj për vrasjen e kampionit të bilardos, Fatjon Bani, vrasje e ndodhur në Vlorë në vitin 2012.
Për mbledhjen e provave, të cilat do të çojnë në identifikimin e autorëve, Policia ka shoqëruar 18 persona, ndërsa në kërkim është shpallur pronari i mjetit “Audi S8”, me targë AA 111 OI, i identifikuar si Ergys Hoxhaj, 33 vjeç. Sipas grupit hetimor, Policia ka kryer kërkime dhe në banesën e Hoxhajt, por nuk ka mundur ta gjejë atë.
Aktualisht ai është konsideruar nga grupi hetimor si personi që pritet të japë të dhëna të rëndësishme për hetimin për mjetin me të cilin lëvizte Dalipaj. Ky mjet, sipas hetimeve, rezulton se një ditë më parë ka rinovuar siguracionin me vlefshmëri 1 vit, në emër të Ergys Hoxhajt.
Deri në gjetjen e Hoxhajt, hetuesit nuk kanë të dhëna se prej sa kohësh Dalipaj udhëtonte në këtë automjet, i cili dy ditë më parë drejtohej nga Xhino (Juxhin) Dautaj./a.m.
