Këshilli Organizativ për festimin e 8-vjetorit të Pavarësisë së Kosovës ka inspektuar hapësirat në sheshin ‘Nëna Terezë’ e ‘Zahir Pajaziti’ të kryeqytetit, ku do të zhvillohen ceremonitë për shënimin e kësaj date.
Për Koha.net përfaqësues të këtij Këshilli thanë se pankartat e opozitës për thirrjen në protestë nuk do të pengojnë ceremoninë festive të Pavarësisë, pasi, sipas tyre, ka hapësirë të mjaftueshme edhe për vendosjen e flamujve shtetërorë. “Ka hapësirë të mjaftueshme për vendosjen e flamujve, dhe pankartat që i ka vendosur opozita nuk do të pengojnë ceremoninë”, ka thënë Sokol Havolli, përfaqësues i Këshillit Organizativ për festimin e Pavarësisë.
Ai gjithashtu ka bërë të ditur se ceremonia do të kryhet para se të fillojë protesta e opozitës. Sipas tij ceremonia do të përfundojë rreth orës 11.
Havolli ka bërë të ditur se parakalimi i FSK-së do të fillojë te rruga ‘Tring Smajli’ për të përfunduar në sheshin ‘Zahir Pajaziti’.
