Zbulohen detaje të tjera nga vrasja e ish-kryepolicit Artan Cuku ditën e djeshme pranë sheshit “Uilson”. “Panorama” mëson se ai është përleshur me një nga autorët, përpara se të ekzekutohej.
Nga këqyrja e vendit të ngjarjes, mësohet se Cuku është qëlluar fillimisht nga njëri prej autorëve në një distancë të afërt dhe ai më pas i plagosur është kthyer dhe e ka sulmuar njërin prej autorëve.
Aty ka ndërhyrë autori tjetër, që ka qëlluar edhe ai deri sa Cuku ka rënë përtokë me 7 plumba në trup, njëri prej të cilit në kokë.
Kjo është mënyra se si u vra ish-kryepolici pranë banesës së tij.
IDENTIKITI I VRASESVE
Një kamera në rrugën që të çon në pallatin ku jetonte ish-drejtori i policisë Artan Cuku u ka dhënë shpresë grupit të hetimit se mund të identifikojnë njërin nga ekzekutorët, mosha e të cilit është jo më shumë se 30 vjeç, raportn TCH.
Ai është i maskuar me një kapele, thanë hetuesit, ndërsa për ndërtimin e identikitit të tij janë bashkangjitur edhe dëshmitë e 11 personave të shoqëruar dhe të pyetur. Por, ajo që mund të ofronte pamje më të sigurta është një kamerë sigurie në hyrje të pallatit, që, pas kqyrjeve, rezulton të jetë jashtë funksionit.
Vrasësi i parë ju shfaq Artan Cukut në shkallët e bodrumit dhe sikurse tregojnë hetuesit, e ka qëlluar atë dy herë.
Në tentativë për të shpëtuar, Artani ka thirrur ashensorin e katit të tretë, por sërish vrasësi e ka arritur dhe e ka qëlluar edhe dy herë të tjerë. Sikurse thonë hetuesit, Artani është përleshur me dy vrasës, njëri prej tyre ka ardhur nga hyrja e jashtme dhe ka humbur jetën në sheshpushimin e pallatit, në “Rrugën e kosovarëve”./a.am.
