Zbardhen të tjera detaje nga operacioni i forcave RENEA dhe autorit të vrasjes së komandatit të FNSH-së në Shkodër Simon Gjeta. Operacioni i cili zgjat plot 12 orë me shkëmbimbe zjarri, u konkludua me vrasjen e autorit Ruzhdi Arishta në orën 7:10 të mëngjesit të djeshëm.
Por sipas policisë, ky ishte një operacion tejet i vështirë dhe nuk kishte ndodhur tjetër herë që një personazh pa precedentë të mëparshëm të bënte kaq rezistencë, raporton Panorama
Kur forcat speciale rrethuan banesën e Arishtës, pas vrasjes së komandantit Gjeta, ata menduan se pas disa të shtënave, autorit do t’i mbaroheshin fishekët. Por e kishin nënvlerësuar. Për orë të tëra, 56vjeçari ka mbajtur në tension mbi 200 forca policie dhe drejtuesit e saj që kishin rrethuar fshatin, duke bllokuar edhe rrugën nacionale nga Shkodra drejt kufirit të Muriqanit. Herë pas here ai qëllonte me fishekë tek, duke bërë që forcat e policisë të mendonin se kishte vrarë veten. Kjo mënyrë është përdorur disa herë prej tij, me qëllim futjen në kurth të efektivëve të tjerë të policisë, që rrezikuan jetën ashtu si dhe komandanti Simon Gjeta. Dyshohet se mbi 200 gëzhoja të jenë derdhur nga arma e Arishtës, ndërsa në banesë ai mbante dhe granata, por që nuk ka arritur t’i ndezë kundër policisë. Duke filluar nga mesnata e së shtunës, policia ka vepruar duke hedhur gaz lotsjellës në drejtim të banesës së 56 vjeçarit. Megjithatë, autori arriti t’ia dilte.
Ai mësohet se kishte përdorur një batanije, si dhe një peshqir të lagur që të rezistonte ndaj gazit lotsjellës. Pas mesnate Arishta ishte i fshehur në një aneks të shtëpisë së tij me 4 dhoma, duke e bërë tepër të mbrojtur nga sulmi i policisë, edhe në rastin kur godina ku jetonte u shemb gati në gjysmën e saj. Disa herë u mendua se ai mund të ishte arratisur, duke kaluar nga pjesa e pasme e shtëpisë, drejt malit, ku dhe kishte një barake të tijën. Por në orët e para të mëngjesit thirrjes së policisë për t’u dorëzuar ai i përgjigjej me shkëmbim zjarri.
Madje mësohet se as motra që jeton në të njëjtën zonë nuk arriti ta bindte. Ajo mori përgjigjen se nëse do të afrohej, do ta hidhte të vdekur. Me durim forcat e policisë pritën deri në mëngjes herët, kur me dritën e agimit të kryenin veprime konkrete.
