Detaje tronditëse na vijnë nga Pogradeci, ku Olsi Çekiçi vrau me thikë nënën e tij, Firdes Çekiçi.
Mësohet se 44-vjeçari ka dashur të vrasë vajzën e tij, pasi kjo e fundit kalonte shumë kohë në telefon. Sipas familjarëve në këto momente ndërhyri gjyshja, e cila mbrojti vajzën. 15-vjeçarja u largua me shpejtësi nga banesa, ndërsa 44-vjeçari vrau nënën e tij.
Një i afërm i viktimës, shprehet se ngjarja nisi për një telefon, ku 44-vjeçari e ka parë në dorën e vajzës së tij dhe ka tentuar ta vrasë. Nëna është futur për të mbrojtur mbesën dhe e pësoi ajo.
“Shkaku është bërë një telefon që ka gjetur, një telefon të çupës. Për ta mbrojtur gjyshja doli para dhe e pësoi ajo. E ëma ka qenë një njeri shumë i mirë, për mbrojtje për vajzën, ndodhi kjo që ndodhi. Në shtëpi rrinin ato të katër, nuk kishte njeri tjetër. Për telefonin e vajzës iku një jetë“, tha një i afërm i viktimës.
Ai ka akuzuar institucionet që e kanë lënë të lirë 44-vjeçarin, i cili vuante nga problemet mendore, ndërsa shton se ai ushtronte dhunë ndaj të ëmës dhe ajo e kishte denoncuar disa herë, por që ishte tërhequr pasi i dhimbsej se e kishte djalë.
“Për mendimin tim them çfarë është ai doktor që e lëshoi. Ajo ka bërë disa denoncime dhe e tërhoqi, se evlat kush do që t’i rrijë djali në burg. Faji këtu është i institucioneve që nuk kontrollojnë“, u shpreh i afërmi.
g.kosovari
