Lordi i drogës Joaquin “El Chapo” Guzman mund të kishte arritur marrëveshje biznesi me aktoren Kate del Castillo, e cila i rregulloi atij takim me aktorin Sean Penn. Deklarata vjen nga Kryeprokurori i Përgjithshëm në Meksikë. Arely Gomez i tha gazetës ‘El Universal’ se po hetohet mundësia e shpëlarjes së parave që e përfshijnë aktoren në biznesin e tekilës. Del Castillo mundësoi intervistën e Penn me Guzman më 2 tetor, e që u publikua nga revista ‘Rolling Stone’ më 9 janar, një ditë pasi Guzman ishte arrestuar, transmeton Express.
Gomez tha se Penn nuk është nën hetime për ndonjë krim. Nga ana tjetër Del Castillo nuk ka pranuar të prononcohet për çështjen. Autoritetet thanë se takimi në mes të Penn, del Castollo dhe Guzman ndihmuan në lokalizimin e lordit të drogës i cili edhe u arrestua. Guzman po mbahet në të njëjtin burg të sigurisë së lartë nga i cili u arratis në muajin korrik.
