40-vjeçari Hekuran Billa, i cili u ekzekutua mbrëmjen e djeshme te Komuna e Parisit ka qenë duke udhëtuar nga Durrësi drejt Tiranës. Ai ka zgjedhur rrugën e Selitës për t’u futur më pas në zonën e Komunës së Parisit ku do të takohej me të motrën, e cila punonte pranë qendrës “Kristal”.
Kjo e fundit është shoqëruar nga policia për të dhënë deklarimet e saj lidhur me komunikimin e fundit që mund të ketë pasur me viktimën.
Billa është qëlluar në momentin kur po parkonte makinën, pasi është mbajtur në vëzhgim edhe nga një tjetër automjet i cili tashmë është identifikuar nga policia.
Bashkëpunëtorët të cilët udhëtonin me këtë automjet, kanë ndihmuar autorët që të largohen nga vendngjarja drejt Pezës, ku policia më pas gjeti të djegur mjetin tip Benz.
Pas ekzaminimit të vendit të ngjarjes, policia ka gjetur gjithsej 15 gëzhoja, 11 prej të cilave kanë prekur viktimën dhe makinën e tij, ndërsa në automjetin e tij janë gjendur edhe disa rroba dhe sende personale të tij.
Pista kryesore e ngjarjes është ajo e hakmarrjes për shkak se në vitin 2006, ai kishte vrarë 22-vjeçarin Prel Marku në Angli ku qëndronte si emigrant, ngjarje për të cilën ka kryer 12 vite burg.
Billa kishte vetëm 5 ditë që ishte kthyer nga Belgjika ku qëndronte me dokumente të rregullta dhe po qëndronte në Durrës tek disa familjarë të tij.
g.kosovari
